Мөслим-информ

Якташыбыз өчен тавыш бирик!

ТАССР төзелүнең 100 еллыгына багышланган 100.tatarstan.ru (16+) сайтында республиканың күренекле шәхесләре өчен тавыш бирү бара. “Үз якташыңөчен тавыш бир!” акциясенә республикабызның бер гасырлык данлы тарихында тирән эз калдырган 45 кандидат кертелгән. Мөслимлеләр Советлар Союзы Герое Днепров (Поганкин) Петр Алексеевич өчен тавыш бирә. Югарыда күрсәтелгән сылтама буенча кереп, батыр якташыбыз өчен тавыш бирергә онытмагыз.

ПЕТР ДНЕПРОВНЫҢ ТИҢДӘШСЕЗ БАТЫРЛЫГЫ

Петр Алексеевич Днепров 1919 елда районыбызньң Островка авылында туган. Рус Шуган урта мәктәбен тәмамлаганнан соң, Урта Азия геология трестында топограф булып эшли. 1939 елда Кызыл Армия сафларына алына, хәрби танк мәктәбен тәмамлый. 1941 елның ноябреннән Бөек Ватан сугышында катнаша. Гвардия капитаны, танк батальоны командиры урынбасары була. П. Днепров хезмәт иткән танк дивизиясе 10 ноябрьдә Тула янында эшелоннан төшү белән сугышка керә. Яшь офицер һәм аның иптәшләре дүрт тәүлек буена үз-үзләрен аямыйча сугышалар. Мәскәү янындагы сугышларда П. Днепров экипажы һәрвакытта һөҗүм итүчеләрнең алгы сафында була. 1942 ел каты бәрелешләр белән үтә. Яшь офицер һәм аның сугышчан дуслары үз-үзләрен аямыйча сугыша. Ике мәртәбә каты яралану Петр Днепровны берникадәр вакытка сафтан чыгарып торса да, ул фидакарьләрчә көрәшүен дәвам итә. 1943 елның җәендә Курск дугасында барган каты сугышларда катнаша. 1945 елның гыйнварында танкистларга укчы дивизияләр белән берлектә дошманның көчле оборона линиясен өзәргә боерык бирелә. Шушы операция вакытында капитан Петр Днепровка дошман тылына разведка ясарга кушыла. Бу героик поход дүрт көн дәвам итә һәм гомуми уңыш белән тәмамлана. Бу көннәрдә Днепров отряды дошманның 180 автомашинасын, 8 орудиесен, 4 танкын, 200ләп солдат hәм офицерын юк итә. Ил азатлыгы өчен көрәштә командованиенең сугышчан заданиеләрен үрнәк төстә үтәгәне һәм күрсәткән тиндәшсез батырлыгы өчен Югары Советы Президиумының 1945нче елның 27 февральдәге Указы нигезендә гвардия капитаны Петр Алексеевич Днепровка Советлар Союзы Герое исеме бирелә. Ул, көнбатышка походын дәвам итеп, Одер һәм Шпрее елгаларын кичүдә катнаша, Бөек Җиңү көнен Берлинда каршылый. Отставкадагы майор П. А. Днепров сугыштан соң Киев шәһәрендә яши, партия органнарында эшли, соңрак инженер хезмәтен башкара. Ул 1974нче елның 23 июлендә Киевта вафат була, Лукьяновск хәрби зиратында күмелә.

ГЕРОЙ ИСЕМЕ МӘҢГЕЛӘШТЕРЕЛДЕ

Рус Шуган мәктәбендә 2015нче елның 1 сентябрендә Петр Днепров истәлегенә мемориаль такта ачылды. Район Башкарма комитеты карары нигезендә Рус Шуган төп гомуми белем бирү мәктәбенә Петр Днепров исеме бирелде. Мәктәптә ел саен герой истәлегенә районара волейбол турниры оештырыла. Рус Шуган авылында һәм Мөслимдә герой исемен йөртүче урам бар. Сугышчан һәм хезмәт даны мемориаль комплексында Советлар Союзы Герое Петр Днепровның бюсты урнаштырылган.

Фото – “Мөслим информ” архивыннан.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: