Мөслим-информ

XXI гасыр яшьләре ирек ярата

Яшьләр турында төрле тәнкыйть сүзләрен еш ишетәбез. Минемчә, замана яшьләре инициативалы.

“Хәзерге яшьләр гел эшләргә теләмиләр. Күңел ачарга, күбрәк ял итәргә hәм, гомумән, рәхәт яшәргә телиләр”. Мондый фикерне ишеткәнегез бардыр. Өлкән буын яшьләрне җиңел акыллылыкта гаепли, мөстәкыйль тормышка аяк басарга ашыкмаган hәм, әлбәттә инде, интернетта, социаль челтәрләрдә вакытны күп үткәргән өчен орыша.
XXI гасыр – технологиялар гасыры. Фән-техника өлкәсендә зур адым ясалды. Әмма бер парадокс бар: бер өлкәдәге алгарыш икенче өлкәдә регресс китереп чыгара. Каршылык тудырган фикерләрнең тагын берсе – яшьләрнең артык тырышмыйча, хәтта эшләмичә генә акча эшләү теләге. Әби-бабаларыбыз акчаны тир түгеп тапканнар шул, шуңа аларга яшьләрне аңлавы кыен. Әмма яшьләрне ачулану гаделме? Әйе, хәзерге яшьләр соң өлгерәләр, ләкин яшәргә ашыгырга кирәкме икән? 
XXI гасыр яшьләре максатчан һәм инициативалы. Бүгенге яшьләр, ошамаса, озак уйлап тормыйча уку йортларын да, һөнәрләрен дә үзгәртә. Үзләрен төрле өлкәләрдә сынап карарга омтылалар, гаилә корырга ашыкмыйлар, чөнки башта үзеңне табарга, дөнья күрергә, тормышны өйрәнергә кирәк. XXI гасыр үзеңне тормышка әзерләү өчен күп мөмкинлекләр бирә, яшьләр алардан оста файдалана һәм үз фикерләрен дә курыкмыйча әйтәләр.
Интернет-технологияләр үсеше дөньяны виртуаль платформага күчерү сәбәпле үзгәрешләргә тиз җайлашырга туры килә. Эш эзләү дә катлаулана бара, чөнки диплом булу эшең бар, дигән сүз түгел. Яшьләр социаль челтәрләрдә эзләнә. Статистика буенча 2021 елда яшьләр арасында үзмәшгульләр саны унөч тапкыр арткан. Алар арасында визажист, кондитер, маникюр осталары, чәчтараш, массажистлар күп. Яшьләрнең төрле юнәлештә хәрәкәт итүе, үзгәрешләрдән курыкмавы – үсеш двигательләренең берсе, дип әйтергә була. 
Яшьләр хәзер яшәү өчен эшли. Алар ирекле. Тормыш юлын сайлауда гына түгел, яшьләр иҗтимагый фикердән дә азат. Яңаны сынап карарга, ялгышырга курыкмыйлар. Кыскасы, ашыкмыйлар, ә тормышның һәр мизгеленнән тәм табып яшәргә тырышалар.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: