Ветераннар фикер алышты

Район ветераннар советы рәисе Ил­гиз Низамов, 2020 елда башкарылган эшләрне барлаганнан соң, зиратларны тәртипкә китерү мәсьәләсенә туктал­ды. “Мәңгелек йортыбызны карап тоту – безнең бурыч”, – диде ул. Зиратлар­ны, җыештырып, карт агачларны ки­сеп, тәртиптә тотучы Тойгелде, Ташлыяр, Тугаш, Симәк, Түреш, Шуганка, Элемтә, Дусай авыллары үрнәк итеп китерел­де. Тойгелдедә авыл халкының иници­ативасы белән борынгы зиратка да кой­ма койганнар. Илгиз Низамов быел да, гадәттәгечә, зиратларда өмәләр оешты­рылачагы турында хәбәр итте һәм бу хак­та авылдан читтә яшәүчеләргә дә әйтергә кирәклеген искәртте. 30 апрельдә – авыл зиратларында, 1-3 май көннәрендә район үзәгендәге зиратта өмәләр оештырыла.

Россия пенсионерлар союзының Мөслим бүлеге җитәкчесе Рөстәм Шәрипов өлкәннәр тормышын даими яктыртып баручы “Авыл утлары” газе­тасына һәм Мөслим телевидениесенә рәхмәтен җиткерде. Пленум утыры­шына килгән өлкәннәрдән һәркайсы үзләрен борчыган мәсьәләләргә ачы­клык кертергә тырышты. “Бөек Ватан сугышында һәлак булучылар истәлегенә куелган һәйкәлләрне нигә хәрби ко­миссариат карамый?” дигән сорау­га Моряк Йосыповның җавабы үтемле иде: “Һәйкәлләр хәрби комиссариат өчен түгел, үзебез, балалар өчен, хәтер яңарып торсын өчен кирәк!” Мөслимнән Илсөяр Кашапова зират белән йорты арасына койма кою мәсьәләсен куз­гатты. Район башлыгы Рамил Муллин әлеге мәсьәләне хәл итәргә вәгъдә итте. Метрәйдән Мирзанур Галимов тәрбия эшендә муллаларның гына түгел, абыстайларның да катнашуын билгеләп үтте һәм аларга да юнәлеш бирергә кирәклеген искәртте. Мөслимнән Аль­берт Иванов коронавируска каршы вакцинация ясаткан һәм башкалар­ны да әлеге авыруга каршы привив­ка ясатырга чакырды. Иске Вәрәштән Тәнзилә апа дару үләннәре үстерүен әйтте. Исәнсефтән Мөҗәһидан Мортазин авылларда эшләүче ветераннар советла­ры рәисләренә бушлай икмәк бирергә дигән тәкъдим кертте. Мөслимнән Га­лия Фәрхетдинова өлкәннәр исеменнән район башлыгына рәхмәтен җиткерде. Утырышны район башлыгы Рамил Мул­лин йомгаклады.

– Гореф-гадәтләрне, туган теле­безне, милләтебезне саклау турында күп сөйлибез. Милләтне саклау, иман­лы булу өчен бүгенге яшь буынга әби- бабай тәрбиясе җитми. Егет-кызла­рыбыз киләчәктә ышанычлы тормыш иптәшләре, яхшы әти-әниләр бул­сын өчен дә әби-бабайларның үгет- нәсыйхәте кирәк. Оныклар тәрбияләүгә сез дә үз өлешегезне кертсәгез иде, – диде ул, өлкәннәргә мөрәҗәгать итеп.

Соңыннан бертөркем өлкәннәргә район башлыгының Рәхмәт хатлары һәм район ветераннар советының Мак­тау грамоталары тапшырылды. Татар­стан Республикасы ДОСААФ оешмасы тәкъдиме белән хәрби-патриотик тәрбия бирүдә озак еллар намуслы хезмәте өчен Мөслим лицееның “Боец” клубын җитәкләгән Иванов Альберт Викторо­вич “Бөек Ватан сугышында җиңүгә 75 ел” истәлек медале белән бүләкләнде.

Римма Афзалова.

Айрат Фазылов фотосы.