Реклама
Яңалыклар
Вакцинацияләү турында җиде сорау
ТР буенча Роспотребнадор идарәсенең Яр Чаллы территориаль бүлеге җитәкчесе Илгизәр Бариев белән коронавируска каршы вакцина ясату турында әңгәмә кордык.
– Илгизәр Габделхакович, COVID-19га каршы кайсы вакцина нәтиҗәлерәк?
– Россиядә теркәлгән барлык вакциналар да нәтиҗәле һәм куркынычсыз. Хроник авыруларыгыз яисә организмыгызның башка үзенчәлекләре булган очракта нинди вакцинаны сайлау турында табиб белән киңәшегез.
– Коронавирус белән авырган булсаң да, прививка ясатырга кирәкме?
– Әйе, элек коронавирус белән авырган булсаң да, прививка ясатырга кирәк. COVID-19дан терелгән кешеләрнең вируска карата табигый иммунитетлары барлыкка килә. Әмма аның күпмегә кадәр дәвам итәчәге, сезнең никадәр сакланган булуыгыз төгәл билгеле түгел. Вакциналар ышанычлы саклану тәэмин итә. Вакцинаны авырып терелгәннән соң берничә ай үткәч ясатырга тәкъдим ителә.
– COVID-19дан булган вакциналар ДНКга үтеп керә аламы?
– Юк, бу авыруга каршы булган бер генә вакцина да сезнең ДНКгызга берничек тә тәэсир итми, аның белән бәйләнешкә керми. Вакциналар организмның иммун клеткаларын коронавирусның генетик материалының фрагментлары белән таныштыра, алар аны истә калдыра һәм вирустан саклауга юнәлтелгән антитәнчекләр ясый башлыйлар.
– COVID-19га каршы вакциналар бала табуга тискәре йогынты ясый аламы?
– Бер төрле вакцинаның да, шул исәптән коронавируска каршы вакцинаның да хатын-кызлар яисә ир- атларның фертильлегенә тәэсир итүе исбатланмаган. Россиядә җитештерелгән коронавируска каршы вакциналар лаборатория хайваннарында нәселгә тәэсир итүне бәяләүгә тиешле тикшерү үтте. Тискәре нәтиҗәләр ачыкланмады. Хәзерге вакытта бала табарга планлаштырсагыз, вакцинацияләүдән соң моннан баш тартырга кирәкми.
– Вирус үзгәрүчән. Вакциналар яңа вариантларга карата да эшләячәкме?
– Бөтен дөньяда экспертлар әлеге авыруның яңа вариантларын, аларга карата вакциналарның нәтиҗәлелеген даими өйрәнә. Әлегә авыру барышына яисә эпидемия процессына тәэсир итәрлек патоген үзгәрешләр ачыкланмаган. Бер яисә берничә вариантка карата кайсы да булса вакцинаның нәтиҗәлелеге кимрәк булуы расланган очракта вакцинаның составын үзгәртергә мөмкин булачак.
Вирус таралмасын өчен прививка ясату мөһим. Бу вирусның үзгәрү мөмкинлеген киметәчәк. Роспотребнадзор вирусның үзгәрүенә даими күзәтү алып бара.
Шул ук вакытта социаль дистанция саклау, маска киеп йөрү, кулларны юу һәм вакытында медицина ярдәме сорап мөрәҗәгать итү актуаль булып кала.
– COVID-19га каршы вакцина авыруга тестка уңай нәтиҗә күрсәтә аламы? Мәсәлән, ПЦР-тестка яисә антиген тестка?
– Юк. Тестны ясаганда кешенең иммунитеты түгел, ә актив авыру булу-булмавы тикшерелә.
– Прививкадан соң кеше коронавирус белән авырырга мөмкинме?
– Коронавируска каршы прививкадан соң да авырырга мөмкин. Прививка ясатканнан түгел, ә авыруны йоктырганнан соң. Әмма мондый очраклар сирәк. Һәм алар вакциналауның тулы курсын тәмамламаган яисә саклану чараларын үтәмәгән кешеләрдә күзәтелә. Вакцина ясатканнан соң авырган кешеләр инфекцияне җиңел кичерә, өзлегүләр булмый.
Мөнирә Арсланова.
Следите за самым важным и интересным в Telegram-каналеТатмедиа
Безнең телеграм каналга кушылыгыз! Телеграм-канал
Нет комментариев