Күпфатирлы катлы йортларда гомер итүчеләр бер-берсе турында бөтен нәрсәне белеп тора дисәк тә, ялгышмабыз. Уч төбендәге тормыш һәркемнең күз алдында. Мөслимнең Авзалов урамында тыйнак кына тормыш алып баручы Рәсидә Саттарованы да тынгысыз җан буларак беләбез.
Кечкенәдән кул арасына кереп үскән кызчык җырчы булырга хыяллана. Моңлы һәм үзгә тавышын авылдашлары да бик ярата. Авылда концерт яисә берәр тамаша оештырыла калса, "Мөхтәр кызы катнашамы?" дип, клуб мөдиреннән сорый торган булганнар.
Мәлләтамак авылында Мөхтәр абый белән Моссалия апа гаиләсендә икенче бала булып дөньяга аваз салган Рәсидә авылда иң чая кызларның берсе була. Мәктәпне тәмамлагач, Яр Чаллы шәһәренең тегү ательесына өйрәнчек булып эшкә урнаша. Биредә свитер, джемперлар, күлмәк, гамажлар бәйли ул. Тиз арада өйрәнчектән оста тегүче дәрәҗәсенә күтәрелә. Аның белән ул елларда бергә эшләгән Галия Мәрдәнова: "Рәсидә ательега килү белән барыбыз да ошаттык аны. Авыл кызларына хас оялчанлык белән бергә үҗәтлек тә бар иде анда. Эшкә кулы ятып торды. Яратып эшләде, белмәгән нәрсәләрен сорый иде", - ди. Яр Чаллы шәһәренең трикотаж ательесында биш ел хезмәт куйганнан соң, язмыш кызны Таджикстан якларына илтә. Биредә дә үз һөнәре буенча эшли Рәсидә. Башкорт егете Данил белән гаилә коралар. Уртак бәхетләре булып, уллары Динар тугач, гаилә тагын да түгәрәкләнә. Тик язмыш дигәнең аяусыз була. Гомер диңгезен парлашып кичү насыйп булмый аларга. Язмыш башта тормыш иптәшеннән аера, соңыннан бердәнбер улы да фаҗигале төстә үлә. Газиз улын югалту ачысы сөйкемле йөзенә хәсрәт шәүләсе, чәчләргә ак бәс булып төшә. 
Ләкин шушындый авыр вакытларда да ихтыяр ныклыгын югалтмаслык көч таба ала үзендә Рәсидә апа. Бүгенге көндә лаеклы ялда булган райондашыбыз кул эше белән шөгыльләнә, шәлләр бәйли. "Кибетләрдә сатуда мондый бәйләм шәлләр булмагач, сораучылар күп. Үзләре теләгән төс һәм бизәк белән дә бәйләргә була", - ди Рәсидә апа. "Аның ыргак белән ул бәйләгән шәл-яулыклары, свитер-кофталары кемнәрне генә җылытмый икән?" - ди әнисе Мосаллия апа кызы белән горурланып. Чыннан да, бик матур, үзенчәлекле аның кул эшләре. Аңың бәйләмнәренән ниндидер яктылык, якыннарына биреп бетерә алмаган җылылык бөркеләдер төсле.
Лилия Шәймиева.
Иң мөһим һәм кызыклы язмаларны Татмедиа Telegram-каналында укыгыз
