Мөслим-информ

Уку алдынгылары хөрмәтләнде

Уку алдынгыларын, төрле өлкәдә уңышка ирешкән укучыларны хөрмәтләү тантанасы матур традициягә әйләнде.

Бәйрәм быел да “Кояшлы Ык” ял зонасында узды. Тантана­да уку алдынгылары, төрле фән бәйгеләре җиңүчеләре, мәдәният, спорт өлкәсендә уңышка ирешкән, җәмәгать эшләрендә актив катнаш­кан укучылар хөрмәтләнде.

Бәйрәмдә Г. Тукай исемендәге Мөслим урта мәктәбеннән – 38, гимназиядән – 30, лицейдан – 28, Күбәк урта мәктәбеннән – биш, Тойгелдедән – дүрт, Михайловка белән Олы Чакмак мәктәпләреннән – өчәр, Тат. Бүләр, Мари Бүләр һәм Тат. Шуран мәктәпләреннән – икешәр, Әмәкәйдән бер уку алдынгысы катнашты.

– Укучылар – Мөслимебезнең киләчәге. Балаларның фән олимпиада­ларында яулаган биеклекләре Мөслим данын еракларга тарата. Укучылар спортта да сынатмыйлар, җәмәгать эшләрендә дә актив, – дип, егет-кыз­ларны тәбрик итте район башлыгы Альберт Хуҗин.

“Мөслим йолдызы-2022” титу­лы биш укучыга һәм ике укытучы­га бирелде. Әлеге мәртәбәле исемгә укудагы уңышлары өчен – Мөслим лицееннан Камилә Хантимерова, гимназиядән Шамил Баянов, Мөслим урта мәктәбеннән Азалия Хафизова, спортта ирешкән уңышлары өчен – Тат. Бүләр мәктәбеннән Салават Са­лихов, иҗаттагы уңышлары өчен Түбән Табын интернат-мәктәбеннән Адель Мөбәрәков лаек булды. “Тукай бизәкләре” бию төркеме коллективы (җитәкчесе – Ольга Нуруллина) һәм лицейның быелгы уку елында “Иң тату сыйныф” исемен алган 5А сыйныфы укучылары һәм әти-әниләре (сый­ныф җитәкчесе – Ләйсән Сафина) дә “Мөслим йолдызы” титулын алды.

“Ел укучысы” исеме Мөслим гимназиясенең 9 сыйныф уку­чысы Илина Бариевага бирел­де. Гимназиянең 9 сыйныф укучы­сы Камилә Минһаҗева – “Мөслим кызы”, Мөслим урта мәктәбенең 9 сыйныф укучысы Илназ Морзаханов “Мөслим егете” дип игълан ителде. Алар шушы исемдәге проектның сим­воллары – калфак һәм кәләпүш белән бүләкләнде.

Район мәгариф идәрәсе җитәкчесе Лилия Хәбибуллина егет-кызлар­га изге теләкләрен җиткерде. Төрле өлкәләрдә уңышка ирешкән 78 бала­га, “Тукай бизәкләре” бию төркеменә һәм спорт мәктәбенең хоккей, баскет­бол, волейбол командаларына рай­он башлыгының Мактау грамоталары тапшырылды.

– Улым Илнур Мөслим лицееның 4 сыйныфында укый. Ул мондый тан­танада икенче мәртәбә катнаша. Әти- әни өчен баласының яхшы билгеләргә укуы – зур сөенеч. Уку алдынгы­сы булу җиңел түгел, зур тырышлык һәм хезмәт таләп итә. Улыбызның уңышларында укытучыларның да лаеклы өлеше бар. Мәктәптә алган белемнең бөртеген дә исраф итмичә, тормышта куллана белсәләр, балала­рыбыз беркайда да югалып калмас, – ди бәйрәмне тамаша кылырга килгән Мария Латыйпова.

– Бүләкләнүчеләр арасында ми­нем оныгым да бар! Мөслимлеләрнең киләчәге өметле. Һәр бала нинди дә булса өлкәдә – лидерлар рәтендә. Шак­катмалы, бүләкләнүчеләр саны ел саен арта бара. Балалар дәртләнеп укый, алларына максат куеп, алга омтыла. Имтиханнарын да уңышлы тапшы­рырга насыйп булсын, тел ачкычла­ры бирсен! – ди Халидә Морзаханова.

Районыбызның мәктәп директор­лары үзенчәлекле бүләк әзерләгән иде. Берничә дистә ел элек мәктәпне тәмамлаган егет-кызлар, яшьлек ел­ларындагы мәктәп формаларын киеп, “Мәктәп бакчасының шомыртлары” җырын башкарды.

Быелгы бәйрәм сюрпризларга бай булды. “Дакар-2022” ралли-марафо­нында катнашкан “КАМАЗ-мастер” экипажы чарага кунак итеп чакы­рылган иде. Алар спортта уңышка ирешкән егет-кызларны котлады. Мәйданга чыккан спортчылар бик күп иде. Спортка тартылучы, сәламәт яшәү рәвешен сайлаган яшьләрнең күп бу­луына тагын бер мәртәбә инандык. Бәйрәм барышында легендар “КамАЗ” белән фотога төшүчеләрнең, штурман белән аралашучыларның исәбе юк иде. Бу көнне интернет челтәрләрендә әлеге “КамАЗ” төп геройга әйләнде кебек.

Бәйрәмгә махсус кунаклар да ча­кырылган иде. “Мирас” инструмен­таль ансамбле, “ВИА-ХИТ” музыкаль төркеме чыгышын райондашлары­быз яратып карады. Музыкантлар Та­тар, рус, инглиз һәм башка телләрдә танылган хитлар башкарды.

Лилия Шәймиева фотосы.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Комментарии (0)
Осталось символов: