Мөслим-информ

Муслюмовский район

18+
2024 - Гаилә елы
Яңалыклар

Уеннар – милләт сагында

Соңгы елларда милли гореф-гадәтләрне яңартуга зур игътибар бирелә. Халкыбызның милли традицияләренә багышланган чаралар да еш үткәрелә. “Уен-фест” республика проекты – шуларның берсе. Әлеге проект кысаларында Мөслимгә “Агыйдел” дәүләт җыр һәм бию ансамбле килде. 

“Уен-фест” республика традицион уеннар фестиваленә узган ел старт бирелде. Татарстан республикасы мәдәният министрлыгы театр, мәдәният йортлары хезмәткәрләре белән берлектә милли уеннар оештырган иде. “Уен-фест” проекты балаларны, виртуаль дөньядан аерып, милли мәдәният аша тере аралашуга җәлеп итүне күздә тота. Шул ук вакытта милли уеннар һәм гореф-гадәтләр аша яшь буынны тәрбияләү, республикабыздагы күпмилләтле халыкларның бердәмлеген ныгыту максат итеп куела.

Быел “Уен-фест” проекты Мөслимгә дә килеп җитте. Актаныш районының “Агыйдел” дәүләт җыр һәм бию ансамбле “Курай” паркында милли җыр-биюләр, уеннар тәкъдим итте.

– “Уен-фест” проекты кысаларында чыгышларны Мөслим районыннан башларга булдык. Чарада күренекле якташларыбыз Зифа Басыйрова, Илһам Шакиров, Әлфия Афзалованы искә алдык, аларның репертуарларындагы җырларны яңгыраттык, – ди “Агыйдел” дәүләт җыр һәм бию ансамбле җитәкчесе Лилия Ялалова.

“Агыйдел” ансамбле составында Мөслим кызы да чыгыш ясый. Хор артисты Инзилә Мадышина әлеге ансамбльдә беренче елын гына эшли. Инзилә туган җирендә – райондашларыбыз алдында чыгыш ясавы белән горурлануын белдерде.

Чара барышында татар халык җырлары яңгырады, төрле милләт биюләре тәкъдим ителде. Балалар белән уеннар да оештырылды. Кыю һәм актив булганнарга бүләкләр дә эләкте. Тик “җәза алучылар”ның күпчелеге югалып калды кебек: җырлый, бии белмиләр, шигырьләрне хәтерләмиләр. Уеннарны оештыручы кайберләреннән хәтта: “Нәрсә эшли беләсең соң син?” – дип сорарга мәҗбүр булды. Балаларыбыз, чыннан да, тере аралашуны онытып бара түгелме?! Тамашачылар, читтән генә күзәтеп калмыйча, җырладылар да, биеделәр дә. Ә татарның гимнына әйләнгән “Туган тел” җырын мөслимлеләр ансамбль белән бергә башкарды.

Тәмле әйбер күп булмый, диләр. Кызганыч, миллилеккә нигезләнгән әлеге чара тиз төгәлләнде.

Римма Афзалова.

Следите за самым важным и интересным в Telegram-каналеТатмедиа

Безнең телеграм каналга кушылыгыз! Телеграм-канал

Без "Дзен"да! Дзен


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Реклама
Реклама
2
X