Тәмлетамак: Әлфинур Ногмановадан бишбармак рецепты

- Иң элек шулпада майлы ит пешерергә куябыз. Бишбармак өчен тавык, сарык, сыер, үрдәк яки каз итен аз-азлап салсаң да, әлеге "ассорти" ның һәрберсеннән аерым гына пешерсәң дә була. Ит пешеп чыгар алдыннан 1 литр сыешлы кәстрүлгә яки чүмечкә шулпадагы өрене (ул күп булмаса, бераз шулпа да өстисең) җыеп саласың, өрегә ярымтүгәрәк итеп туралган суган һәм бераз тоз саласың да, пешерергә куясың. Суган үтү күренмәлегә әйләнгәч, уттан алырга була.

Ит пешкәннән соң, шулпага әрчелгән түгәрәк бәрәңгеләр салып пешерәсең. Бәрәңгене сөзеп алып, зур тарелкага саласың һәм бераз ваклыйсың. Бәрәңге пешкән арада зур гына җәем токмач камыры җәеп куясың, гаиләдә камыр яратучылар күп булганда ике җәем дә артык булмый. Һәм камырны ромбиклап турап, ит белән бәрәңге пешкән шулпада кабартып аласың. Камыр пешкән арада зур тарелкадагы туралган бәрәңге өстенә пешкән итне турап саласың. Ит өстенә - камырның (камырны иң аста калдырсаң да була) һәм иң өскә өредә пешкән суганның бер өлешен саласың (суынып китсә, кайнарлап алырга да була).

Исеменнән күренгәнчә, бишбармакны фәкать кул белән генә ашыйлар. Аның бөтен тәме дә шунда. Ашауның да тәртибе бар: иң элек кулга камыр аласың, аның өстенә ит, бәрәңге һәм суган салып, камырны төргән кебегрәк итеп кабасың. Тарелкада камыр һәм суган беткән саен, өстәп торасың. Ингриедентлар кала икән, аларны шулпага салып, икенче көнне ашау өчен калдырасың.

Кайдадыр бишбармакны - бәрәңгесез генә, кайдадыр кишер дә салып пешерәләр. Әзер шулпаны касәгә салып бирүчеләр дә бар. Кемгә ничек ошый, кемнең фантазиясе ничек эшли инде. Иң мөһиме: бишбармагыгыз тәмле булсын!