Мөслим-информ

Муслюмовский район

18+
2024 - Гаилә елы
Яңалыклар

Тәмлетамак: Әлфинур Ногмановадан бишбармак рецепты

"Нигездә ит һәм камырдан торган бу туклыклы ризыкны үзбәкләр дә, казах һәм кыргызлар да, башкорт һәм татарлар да яратып пешерә. Ләкин шунысы бар: бишбармакны ике кеше бергәләп әзерләү уңайлырак", - ди коллегабыз Әлфинур Ногманова. Әлеге ризыкны әзерләү серләрен ул газета укучыларыбызга да сөйләде.

- Иң элек шулпада майлы ит пешерергә куябыз. Бишбармак өчен тавык, сарык, сыер, үрдәк яки каз итен аз-азлап салсаң да, әлеге "ассорти" ның һәрберсеннән аерым гына пешерсәң дә була. Ит пешеп чыгар алдыннан 1 литр сыешлы кәстрүлгә яки чүмечкә шулпадагы өрене (ул күп булмаса, бераз шулпа да өстисең) җыеп саласың, өрегә ярымтүгәрәк итеп туралган суган һәм бераз тоз саласың да, пешерергә куясың. Суган үтү күренмәлегә әйләнгәч, уттан алырга була.

Ит пешкәннән соң, шулпага әрчелгән түгәрәк бәрәңгеләр салып пешерәсең. Бәрәңгене сөзеп алып, зур тарелкага саласың һәм бераз ваклыйсың. Бәрәңге пешкән арада зур гына җәем токмач камыры җәеп куясың, гаиләдә камыр яратучылар күп булганда ике җәем дә артык булмый. Һәм камырны ромбиклап турап, ит белән бәрәңге пешкән шулпада кабартып аласың. Камыр пешкән арада зур тарелкадагы туралган бәрәңге өстенә пешкән итне турап саласың. Ит өстенә - камырның (камырны иң аста калдырсаң да була) һәм иң өскә өредә пешкән суганның бер өлешен саласың (суынып китсә, кайнарлап алырга да була).

Исеменнән күренгәнчә, бишбармакны фәкать кул белән генә ашыйлар. Аның бөтен тәме дә шунда. Ашауның да тәртибе бар: иң элек кулга камыр аласың, аның өстенә ит, бәрәңге һәм суган салып, камырны төргән кебегрәк итеп кабасың. Тарелкада камыр һәм суган беткән саен, өстәп торасың. Ингриедентлар кала икән, аларны шулпага салып, икенче көнне ашау өчен калдырасың.

Кайдадыр бишбармакны - бәрәңгесез генә, кайдадыр кишер дә салып пешерәләр. Әзер шулпаны касәгә салып бирүчеләр дә бар. Кемгә ничек ошый, кемнең фантазиясе ничек эшли инде. Иң мөһиме: бишбармагыгыз тәмле булсын!

Следите за самым важным и интересным в Telegram-каналеТатмедиа

Безнең телеграм каналга кушылыгыз! Телеграм-канал

Без "Дзен"да! Дзен


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Реклама
Реклама
2
X