Тәмле дә соң карга боткасы!

"Иртәгә Карга боткасы пешерәбез, килерсез яме," - диде Рамил абый. Безнең әңгәмәне тыңлап торган Асылъяр: "Минем карга боткасы ашыйсы килми, миңа чыпчык боткасы пешерегез," - дип, елый ук башлады. Кечкенә кызыма аңлату эшләре алып барырга туры килде.

Гореф-гадәт - ул һәр халыкка хас йолалар. Татар халкы элек-электән бик тыйнак халык булган. Шулай да эшне дә тырышып башкарган, вакытында ял да итә белгән. Көз көне уңышлар җыелгач, "Сөмбелә" бәйрәмен уздырган, яз көне исә "Нәүрүз бәйрәме" белән кышны озаткан. Җәй башында - чәчүләр тәмамлангач, шаулатып-гөрләтеп Сабантуйны үткәргән. Ә менә "Карга боткасы" балаларның иң яраткан бәйрәме булган. Яз көне җирләр кардан ачылгач, балалар авыл буйлап кешеләрдән ярмалар, май, йомырка, төрле тәм-том җыйганнар. Бер өлкән кеше белән яланга чыгып, ботка пешергәннәр.

Безнең Вәрәшбаш авылында да бу гадәт әле дә саклана. Без дә ел саен диярлек Карга боткасы пешерәбез. Ә быел карга боткасын клуб мөдире Рамил абый әзерләде. Бәйрәмгә әбиләр, апа-абыйлар, малайлар-кызлар килгән иде. Йола буенча казанда пешкән ботканы беренче итеп, җиргә салдык. Бу уңыш күп булсын өчен. Икенче итеп, яңгыр вакытында яусын өчен, ботканы елга буена алып барып, суга салдык. Бераз каргаларга да бирдек тә, бәйрәмгә килгән барлык кешеләрне дә ботка белән сыйладык. Төрле ярмалардан пешкән бу ризык телне йотарлык тәмле булды. Төрле уеннар уйнадык, табигатьне күзәттек. Бәйрәм бик күңелле булды.

Миләүшә Хәсәнова,

Мөслим районы Вәрәшбаш мәктәбе укытучысы.