"Тик Мөнирә апа бирешә торганнардан түгел..."

Табибларның үз эшенә салкын каравы аркасында бүген өченче төркем инвалид ул. Унбиш ел элек күзе сукыр әбине мунча керткәндә угар газга исереп, кайнар суга пешкән. Крандагы кайнап торган су астында тагын күпме яткан булыр иде икән, бәхеткә, тормыш иптәше Зөфәр хәләлен эзләп килгән.

Вакытында район табиблары кичектергесез ярдәм күрсәтмәгәч, сул кулын кисәргә туры килгән. Ике баласы, гаиләсе хакына исән калган Мөнирә апа барлыгы 6 операция кичергән. Шул вакытта эшләп йөргән Мөслимнең коры сөт заводыннан да китәргә туры килә аңа.

Сыңар кулы белән әлеге таш йортның стеналарын өйгән, аның кулыннан шушы мәһабәт йортка 9 мең кирпеч кергән. Ире Зөфәр белән киңәшләшеп гаилә фермасын да булдырганнар. Тиенгә колхоз фермасында эшләп йөргән Зөфәр абый Мөнирә апаның бу фикерен хупласа да, хатынының 5 сыерны берүзенә генә саварга авыр буласын уйлап, тагын борчылган. Тик Мөнирә апа бирешә торганнардан түгел. Тормыш җилләренә йөзен куеп, алга бара ул. Шәхси хуҗалыкларга юк кына акчага сөт сатып җибәрми хуҗабикә. Иртән иртүк торып маен да яза, эремчеген дә ясый. Каз мамыкларыннан мендәрләр дә ясарга өлгерә. Сыңар кулы белән дә бакча тутырып яшелчә, җиләк-җимеш, кавын-карбыз үстергән Мөнирә апа Сикия авылын яшәтергә омтыла - аның йортыннан бирнәгә мендәр, сөт-катык, ит, туйга каз сатып алырга килүчеләр өзелми. "Сыер саварга районнан савым аппараты да бирелсә- сөенер идем, Эшем бераз җиңеләер иде",- ди Мөнирә апа. Без ышанабыз- инвалидлар ункөнлегендә- ихтыяр көче ташып торган бу апаның теләге тормышка ашмый калмас әле.

Лилия Шәймиева.