Күпләр хәбәрдәрдер, Чаллы телеканалының Яр Чаллы шәһәре "Күңел" радиосы белән берлектә оештырылган зур шоу проектына 7октябрьдә старт бирелгән иде. Аның 2 нче сезоны Мөслим районында 17 октябрьдә башланып китте.
"Безнең җырчы" шоу проектының кульминация ноктасы 9 декабрьдә булды. Иң куанычлысы шул - Илфиратыбыз проектның финалына узды һәм Яр Чаллы шәһәрендә Сара Садыйкова исемендәге концерт залында, танылган җырчылар Хәния Фәрхи, Виталий Агапов, Әлфинә Әзгәмова, Гөлдания Хәйруллина, Равил Галиев, Резида Шәрәфиева, "Болгар" бию ансамбле белән бергә бер сәхнәдә чыгыш ясады. Илфиратыбызга район башкарма комитеты җитәкчесенең социаль-мәдәни мәсьәләләр буенча урынбасары Рушат Солтанов, район мәдәният бүлеге җитәкчесе Ирек Салихҗанов һәм мәдәният йорты коллективы, райондашларыбыз Яр Чаллыга барып, аңа көч биреп тордылар. Илфират сәхнәгә чыгып җыр башкаргач та, тамашачылар аны бик озак вакыт алкышларга күмеп сәхнәдән җибәрми тордылар. Танылган җырчы Габидулла Хормәтуллин шәхсән үзе сәхнәгә менеп Илфиратка җылы теләкләрен җиткерде.
СМС тавыш бирү юлы белән Илфират 7 урында калган булса да, жюри әгъзалары аңа тагын өстәмә 60 балл бирде, шулай ук залдагы тамашычыларның күпчелеге дә өстенлекне Илфиратка бирде һәм райондашыбыз проектта җиңүче дип игълан ителде. Илфиратка 50 мең сумлык сертификатны "Чаллы-ТВ" телекомпаниясе директоры Рәис Фәхретдинов тапшырды.
- "Шушы проектны оештыручыларга, "Чаллы-ТВ" телекомпаниясенә, "Күңел" радиосына, шулай ук үзебезнең җитәкчеләргә, район башлыгы Рамил Муллинга бик зур рәхмәтләремне әйтәсем килә",- диде Илфират Зәйниев.
Әйе, җирлегебездә талант ияләре аз түгел, аларның сафын Илфират Зәйниев та тулыландыра.Райондашыбызга киләчәктә дә уңышлар телибез. Моң чишмәң саекмасын, Илфират. Мөслимебезнең сандугачы булып, тагын бик күп биеклекләргә ирешергә язсын сиңа!
Миләүшә Зәкиева.
Иң мөһим һәм кызыклы язмаларны Татмедиа Telegram-каналында укыгыз
