Сынауларга бирешмәскә кирәк!

Мөслимдә яшәүче Адилә Сәйфуллинага тумыштан килгән S формалы сколиоз диагнозы куелган. Авыру кызга 5 яшь булганда очраклы рәвештә ачыклана.

Башта югалып калдым, – ди Адиләнең әнисе Гөлназ. – Нишләргә? Нигә минем балам авырырга тиеш? Со­раулар да, төшенкелеккә бирелгән чакларым да бул­ды. Әмма, төшенкелеккә бире­леп, мәсьәләне хәл итеп, бала­ны терелтеп булмый. Алдыма “Баламны кеше итәм” дигән максат куеп, шушы юнәлештә эшли башладым.

Адилә белән Гөлназ башта Казан табиблары­на мөрәҗәгать итәләр. Ка­зан профессорлары Санкт- Петербургка барырга киңәш итә. Гаилә Санкт- Петербургтагы Г.И.Турнер исемендәге балалар травмо­тологиясен һәм ортопедияне милли медицина тикшеренү үзәгенә юл тота. Биредә балага операция ясарга кирәклеген әйтәләр.

– Петербургта профес­сордан “операция” сүзен ишеткәч, куркып калдым, – ди Адилә. – Хәзер инде кур­кытмый, ияләштем.

Адиләгә бер-бер арт­лы берничә операция яса­ла. Кызның аркасына төрле характердагы махсус тимер конструкцияләр куелган. Бала үскән саен конструкцияләрне дә зурайтырга, озынайтыр­га кирәк. Шул максаттан Адиләгә елына икешәр тап­кыр операция кичерергә дә туры килә. Хәзер гаилә алтын­чы операциягә әзерләнә. “Ал­тынчы операция соңгысы бу­лыр, дип көтәбез. Быел куела­чак конструкцияләр гомерлек булырга тиеш”, – ди Гөлназ.

Хөкүмәт операция ясату өчен квота бирсә дә, Санкт- Петербургка йөрү, дәвалану шактый зур чыгымнар таләп итә. Баланы аякка бастыру өчен гаиләгә банклардан кре­дитлар да алырга туры килә. Бәхеткә, игелекле райондаш­ларыбыз да ярдәм кулын суза.

– Баланың аркасын тоту өчен табиблар корсет билгеләделәр. Тик корсетны ел саен алырга кирәк. Ә аның бәясе 50 мең сумнан да ким тормый. Узган ел “Агрома­стер” җитештерү компания­се җитәкчесе Илгиз Исламов корсет белән ярдәм итте. Бик зур рәхмәт аңа! Үзем эшләгән Түбән Табын интернат- мәктәбе коллективы ел саен ярдәм итә. Хезмәттәшләремә, әти-әниемә, туганнарыма бик зур рәхмәт! – ди Гөлназ.

Бүген Адилә Мөслим лицееның 9 сыйныфында укый. Дәресләрдә утырган­да аркасы арыса, оеса да, сер бирми. “Физик күнегүләр ясау, хәрәкәтләнү авыррак, шуңа физкультура дәресләрендә катнашмаска тырышам”, – ди ул. Шулай да актив тормыш алып бара: төрле конкурслар­да катнаша, район буенча фән бәйгеләрендә җиңүләр яулый.

– Бәйгеләрдә катнашу, җиңүләр һәм җиңелүләр көчлерәк булырга ярдәм итә, – ди Адилә.

Кыз бер ел инде үзен во­лонтер буларак та сыный. “Мөмкинлекләре чикле бала­ларга, әби-бабайларга булы­шабыз, төрле акцияләргә чы­габыз. Яшьләр белән төрле ча­ралар оештырабыз”, – ди кыз. Адилә киләчәктә дә кешеләргә ярдәм итәргә тели – табиб бу­лырга хыяллана.

– Аллаһы Тәгалә безгә сы­нау биргән, без, авырлыклар­ны җиңеп, киләчәккә якты хы­яллар белән яшибез. Бакчада бергәләп яшелчәләр утырта­быз, чүп утыйбыз, бергәләп аш-су әзерлибез. Ял вакытла­рын да бергә үткәрәбез. Сы­науларга бирешмибез! – ди Гөлназ.

Римма Афзалова.

ФОТО – Г.СӘЙФУЛЛИНАНЫҢ ГАИЛӘ АРХИВЫННАН.