"Мизгел" яшьләр үзәге 28 гыйнвар көнне Мөслим студентларын традицион очрашуга җыйды. Район үзәге генә түгел, авыллардан да студентлар килү - яшьләребезнең туган җирләрен ярату хисләре зур икәненә, районның киләчәгенә битараф булмауларына дәлил.
Очрашу бераз үзгә стильдә үтте: беренче өлештә студентлар, командаларга бүленеп, "Кадрлар резервы" республика конкурсында катнашучы Эльвира Гәрәева оештырган "ТАССРның 100 еллыгын каршылап" темасына багышланган квестта белемнәрен сынады. Татарстанның үткәне һәм бүгенгесе белән бәйле 5 станциядә тәкъдим ителгән биремнәрнең барысын да "бишле" билгесенә үтәделәр. Уенда катнашучылар җирлегебезнең иң гүзәл почмаклары сүрәтләнгән истәлек магнитлар, ә җиңгән команда "Нептун" йөзү бассейнына бер еллык сертификат белән бүләкләнде. Чараның икенче өлешендә студентлар чараның - муниципаль район башлыгы Рамил Муллин белән әңгәмә корды. Студентларны Мөслимнең киләчәге борчый. Димәк, белгечлек алгач, үз тормышларын туган җирләре белән бәйлиселәре килә. Әңгәмә барышында эшмәкәрлек белән шөгыльләнергә теләк белдерүчеләр булуы сөендерде.
Егет-кызларны район башлыгының студент еллары, нинди китаплар укуы да кызыксындыра икән. Әлмәт дәүләт нефть институты студенты Алмаз Вагыйзовның "Ничек глава булырга?" дигән соравына район башлыгыннан: "Иң беренче, әлбәттә, үз алдыңа максат куярга, инициатива күрсәтеп, җаваплылык ала белергә кирәк" дигән киңәшен алды. Аграр көллиятнең 2 курс студенты Ильяс Ибраһимов үзләре һөнәри белем алган уку йортына капиталь ремонт ясау мөмкинлеген белеште. Авылларда мәктәпләр ябылу, эшсезлек темаларын уртага салып сөйләшеп, бергәләп әлеге проблемалардан чыгу юлларын эзләделәр. Рамил Хәмзович "Һәрберегез җирлек өчен кирәк! Үзегезне саклагыз, кайда гына булсагыз да "мөслимлеләр" дәрәҗәсен югары йөртегез", дигән җылы теләкләрен җиткерде.
Җанлы әңгәмәнең ахырында бергәләп фотога төштек. Ә чараның өченче өлеше дәртле биюләр һәм кызыклы уеннарны үз эченә алган тематик дискотека белән дәвам итте. Студентлар каникулы уңаеннан февраль башында баскетбол буенча иптәшләрчә очрашу үтәчәк. Шулай ук Яр Чаллы шәһәрендә белем алучы якташларыбыз белән март аенда Ак калада очрашу оештыру да планлаштырыла.
Эльвира Гәрәева, "Мизгел" яшьләр үзәге директоры.
Иң мөһим һәм кызыклы язмаларны Татмедиа Telegram-каналында укыгыз
