Старт алдыннан җитди сөйләшү. Район җитәкчелеге авыл хуҗалыгы хезмәткәрләре белән очраша

"Органик Групп" җәмгыятенең "Урожай" һәм "Ык" агрофирмаларында яңгырларга кадәр үк көзге культуралар тукландыруга керешкәннәр иде. Бу агрочара ике агрофирмада барлыгы 900 гектарда башкарылды. Бер үк вакытта күпьеллык үлән басуларында һәм туңга сөрелгән җирләрдә дым каплау да башланды. Бүген район башлыгы Рамил Муллин әлеге агрофирмаларда эш барышы белән танышты, урыннардагы җитәкчеләр һәм белгечләр белән хәл итәсе проблемалар хакында сөйләште, язгы кыр эшләренә ныклап керешеп киткәнче, барлык агрегатларны һәм тагылма коралларны тагын бер кат карап чыгу, матди байлыкка ныклы контроль булдыру, хезмәт хакы белән проблеманы хәл итү бурычын җиткерде.