Сарымсактан мул уңыш алу серләре

Сарымсакны көздән ничек утыртырга?
Сарымсак уңдырышлы җирләрне ярата, комлы туфракта да яхшы үсә. Түтәлләрне алдан, җирне 25 см тирәнлеккә кадәр казып, сарымсакны утыртканчы 1-1,5 атна алдан әзерләргә кирәк, шуңа күрә 1 кв.метрга 5-6 кг черемә, 30 г суперфосфат һәм 20 г калий тозы кертелә.
Безнең җирлектә сарымсак, туфрак температурасы 5 см тирәнлектә +12 градуска кадәр төшкәч, сентябрь-октябрь айларында утыртыла. Сарымсакны бүлбеләргә утырту алдыннан гына аерырга кирәк. Утыртканда эре бүлбеләрне (6 граммнан артык) һәм уртача зурлыктагы (3-6 гр) бүлбеләрне файдаланырга кирәк. Утыртырга 12 сәгать кала аларны сыек марганцовка эремәсендә яки 1 процентлы бакыр купоросы эретмәсендә тотарга кирәк. Бу сарымсакның тышкы ягын инфекцияләрдән зарарсызландыру өчен эшләнә.
Рәтләрне тигез түтәлдә 20-25 см ара калдырып ясыйлар, үсемлекләр арасында ара 10-12 см булырга тиеш.
Һәм утыртканда төп кагыйдә – бүлбеләрне җиргә батырмагыз, бу тамыр үсешен тоткарлаячак.  Шуңа күрә буразналарга утырту яхшырак. Буразналарда туфрак артык йомшак булырга тиеш түгел, аны бераз тыгызларга кирәк. Бүлбенең өстеннән туфрак өслегенә кадәр 3-4 см калырга тиеш. Утыртмалар өстен 2-5 см калынлыктагы торф катламы, черемә яки пычкы чүбе мүлчәсе белән капларга, түтәлләрдә карны тоту өчен чыбык-чабык салырга кирәк. Яз көне мүлчә катламын алырга кирәк булачак.
Язын сарымсак  түтәлен өч мәртәбә тукландырырга кирәк. Беренчесе – түтәлләрдән кар киткәннән соң 7-10 көн узгач. Түтәлләр азот ашламалары белән тукландырыла: 10 л суга 1 аш кашыгы мочевина яки аммиак селитрасы белән эшләнгән эретмә ясала. Икенчесе – катнаш ашламалар кертү, беренче тукландырудан соң 15 көннән соң башкарыла. Соңгы тукландыру суган формалаша башлаган чорда үткәрелә: 10 л суга 2 аш кашыгы суперфосфат кушып ясала.
Әлеге гап-гади кагыйдәләрне үтәгәндә, сарымсактан мул уңыш алырга  була.

Фото - "Мөслим-информ" архивыннан