“Самовар-Party” серләрне бүлешә
Яшьләрне бүген ниләр борчый, ниләр кызыксындыра? Егет-кызлар нинди уй-теләкләр белән яна? Алар чынга ашармы? Яшьләр тормышына хас булган әлеге сорауларга "Мизгел" яшьләр үзәге дә җавап эзли. Төрле-төрле акцияләр үткәрү дисеңме, үзешчән сәнгатьтә катнашу, яшьләрнең ялын оештыру, Бөек Җиңүнең 70 еллыгына әзерләнү, төрле спорт ярышлары, бәйгеләр уздыру, проектлар яклау, профориентация эше,...
Күпләрегез сизгәндер, соңгы вакытта үзәккә яшьләр ныграк тартыла. Үз чиратында, "Мизгел" бу бергәлекне тагын да ныгытырга омтыла.
Яз башында үзәктә грандиоз проект - "Самовар-Party"га старт бирелде. Ул - очрашулар, яшьләр белән кара-каршы сөйләшүләр, күп кенә проблемаларны уртага салып сөйләшү мөмкинлеге. Бу эчкерсез сөйләшүләрдә җиткерелгән фикерләр нигезендә үзәкнең алдагы эше планлаштырыла. Күптән түгел генә бертөркем югары сыйныф укучылары һәм эшләүче яшьләр белән "Нәрсә ул бәхет? Син үзеңне Мөслимдә бәхетле итеп тоясыңмы?" соравына җавап эзләдек. Әйтергә кирәк, егет-кызларның ваемсыз булмавы, креатив, нигезле фикер йөртүе куандыра.
Чараның икенчесе "Сайлагаң һөнәрең буенча син Мөслимдә эш таба аласыңмы?" темасы астында узды. Шәһәр яшәеше белән таныш булса да, үз бәхетләрен нәкъ менә Мөслимдә тапкан һәм һөнәри уңышка ирешкән якташларыбыз бу көнне дөрес тормыш юлы сайлау алдында торган егет-кызларга гамәли уңыш формуласын бирделәр. "Самовар-Party" да катнашучылар күчтәнәчсез китми. Ул бик күп истәлекле бүләкләр, төпле киңәшләр туплый. Һәр кичәбез самовар алдында коймаклап чәй эчү белән төгәлләнә.
Без күтәргән темалар сиңа да кызык икән, vk.com/mc_mizgel группасында "Самовар-Party" видеоязмалары белән таныша аласың.
