Сабыйның хыялы бар

Эвелина, башка балалар кебек үк, күп белергә омтыла, кызыксыну­чан, җор телле булуы белән соклан­дыра. Тик бер кимчелеге бар – йөри алмый.

10 яшьлек кызга “Балалар церебраль параличы” диагнозы куелган. Әлеге ди­агноз куелган күпләр хәрәкәтләнә ал­мый. Ә Эвелина бик тере! Үзлегеннән дә төрле күнегүләр ясый, шөгыльләнә, әнисе белән әбисе дә кызны аякка ба­стыру өчен күп көч куя.

– Кызым белән авырлы вакытта бар­лык тикшерүләр дә туачак сабыемның сәламәт булуын күрсәтте. Ләкин бала тапканда тиешле чаралар вакытын­да күрелмәде. Бала тудыру бүлегендә кислород җайланмасы булмады. Якты дөньяга аваз салган баламның сәламәт булуында тамчы да шигем юк иде. Тик ул төндә баланың йөрәге өч тапкыр тук­тады! Иртәнге җидедә без мобиль реа­нимация чакырттык, кызымны Түбән Кама шәһәренә алып киттеләр, – дип искә ала Чулпан Зиннәтуллина.

Эвелина вакытыннан алда туа. 14 февральдә туасы бала 4 гыйнвар­да ук аваз сала. Баланы 40 көн Түбән Кама шәһәренең перинаталь үзәгендә дәвалыйлар. Перинаталь үзәктән кайт­кач та кызының аякка басмаячагын белми әле Чулпан...

– Көзән җыерулар башлангач: “Са­быемны ала күрмә!” – дип, агарып кат­кан баламны кочып, Ходайга ялвар­ган минутлар аз булмады. Үсә төшкәч, мондый приступлар, шөкер, кимеде. Хәзер алар елга 2-3 мәртәбә булыр­га мөмкин. Көзән җыеру 45 минуттан алып бер сәгатькә кадәр дәвам итә. Эве­лина үлеп терелгәндәй була. Бала белән бергә мин дә шул ук хисләрне кичерәм, – ди Чулпан.

Бераздан балада астигматизм дигән чир ачыклана. Баланы дәвалау өчен Уфа юлын таптый башлыйлар...

Чулпан кызы белән Симәк авылын­да, алты почмаклы агач йортта гомер кичерә. Өй шактый иске. Йорт эчен Чул­пан курчак өе кебек ясап куйса да, тыш­кы кыяфәте аның ярты гасырлык тари­хы булуына ишарәли.

– Йортның түбәсе сыгыла башла­ды. Түбәнең ян-ягына терәү дә куеп карадык, такталарын да кадакладык. Җил-давылларда түбәнең шиферла­ры купты, урта өлеше сыгылды. Өйдә сәламәтлеге чикле бала бар бит! Түбәне тиз арада алыштырырга кирәк! Әлеге гозер белән район хакимиятенә юл тот­тым. Анда гозеремне игътибар белән тыңладылар. Игелекле иганәчеләр ярдәме белән йортымның яңа түбәле булачагына өмет уяттылар, – ди Чулпан.

– Кызым: “Өйнең түбәсе шыгырдый башлады”, – дигәч, борчуыбызның чиге булмады. Өйнең түбәсе ишелеп, бала­лар матча астында кала күрмәсен, дип ут йоттык. Оныгыбыз Эвелинаны Чул­пан безгә, Мөслимгә китереп куйды. Үзе “гомер иткән өйне ташлап китеп булмый” дип, шул өйдә калды. Чулпан ике төн аш бүлмәсендә (түшәм сыгыл­ган якта түгел) кунган. Икенче көнне иртәнге сәгать биштә түбә ишелгән, – дип сөйли Раушания апа.

Ике атна эчендә түбә ишелеп төшә. Көзге яңгырлар башлана. Җитәкчелек тиз арада өйнең түбәсен ябу хәстәрен күрә башлый. Райондашыбыз – бүгенге көндә Яр Чаллы шәһәрендә яшәүче Ай­рат Шәймөхәмәтов түбәне төзекләндерү өчен кирәкле материаллар кайтарта. Ике көн эчендә түбәне ябып та куялар.

– Айрат Шәймөхәмәтовка рәхмәтебез зур. Игелекле гамәлләре белән күпләрне сокландырган Рүзәл Минһаҗевның да ярдәмен тойдык. Түбә ябу өчен ул ике мәртәбә өмә оеш­тырды. Аның бу игелекле адымы – үзе бер батырлык! Игелекле кешеләр әз түгел икән! “Өмәдә катнашканнар­ны сыйларсың!” дип, бер кыз Әлмәт шәһәреннән үк зур сумка белән әллә никадәр сый-нигъмәт китерде. Гозе­ребезне аяк астына салмаган һәркемгә рәхмәтләребез барып ирешсен иде! Район Башкарма комитеты җитәкчесе Альберт Хуҗинга, район башлыгы урынбасары Азат Әхмәтҗановка, рай­он Башкарма комитеты җитәкчесенең социаль-мәдәни мәсьәләләр буен­ча урынбасарлары Рафаэль Демидов­ка, Марина Бәдретдиновага чиксез рәхмәтлебез, – ди Чулпан.

Тат.Шуран мәктәбе директоры Венера Шаева укытучылар Мулла­нур Әхмәтов, Назыйм Габделхаевны да өмәгә җибәрә. Гомумән, өмәдә бик күп кеше катнаша. Район халкының ярдәмчел булуы әлеге өмәдә тагын бер кат раслана.

–Балаларымны сөендерүчеләр зур савап алдылар. Игелек һәрвакыт изге­лек булып әйләнеп кайта. Эвелина ту­ган йортына кайтканга сөенә. Өмәдә эшләүчеләр туфраксага дым үтмәсен дип, өстән яңгыр явып торганда да эшләрен туктатмадылар. Төнлә фо­нарьлар яндырып та эшләделәр хәтта! Халкыбыз – тырыш һәм бердәм, – ди Эвелинаның әбисе Рушания апа.

Эвелина укуын өйдә дәвам итә. Укытучысы Зилә Галимова Яңа Сәет мәктәбеннән килеп укыта.

Әнисе өчен Эвелина – сер сандыгы. Күңелендәгесен кызы белән бүлешеп яши Чулпан. Ә кызчыкның тизрәк аякка басасы, йөгереп йөрисе килә. Сабыйның теләге хыял гына булып кал­масын иде!

Лилия Шәймиева.

Автор фотосы.