Яңа уку елына яңа күлмәк белән

Тат. Бүләр урта мәктәбендә Исәнсеф, Сикия, Үрәзмәт, Иске Сәет, Тат.Бүләр авылларыннан барлыгы 56 бала белем ала. Алдагы уку елына Үрәзмәт мәктәбеннән 5-9 сыйныфларга тагын 29 укучы киләчәк. Бер түбә астында балалар бакчасы белән фельдшер-акушерлык пункты да урнашкан. Капиталь ремонт эше барышында ике катта да электр чыбыклары алыштырылган. Мәктәпнең керү өлеше, фасады буялган, җылылык системасы яңартылган, беренче кат идәненә плитә түшәлгән. Иң күләмле эш мәктәпнең спортзалына туры килгән дисәк тә ялгышмабыз. Биредә идән җәелгән, светодиодлы 20 яктырткыч куелган, спортзалның түшәме эшләнгән. Кызлар һәм малайлар өчен аерым юыну, киенү-чишенү бүлмәләре, бәдрәф, санузел эшләнгән. Класс ишекләре алыштырылган, мәктәпкә тулысынча пластик тәрәзәләр куелган. Безнең иҗат төркеме килгәндә мәктәпнең икенче катына линолеум җәелеп, ашханәгә асылмалы түшәм ясала иде. Коридорларда асылмалы түшәмнәр эшләнәчәк. Узган ел мәктәпнең түбәсе ябылып, тәрәзәләре алыштырылган булса, балалар бакчасында бәдрәф эшләнгән, электр системасы яңартылган.

Шушындый ук күләмле ремонт эшләре Урәзмәт белән Әмәкәй мәктәпләрендә дә бара.

Әмәкәй мәктәбенең түбәсе ябылып, алгы өлеше эшләнеп беткән. Электр чыбыклары тулысынча алыштырылып, мәктәпкә энергия саклаучы яктырткычлар куелган, бәдрәф бүлмәсе эшләнгән, класс ишекләре алыштырылган, пластик тәрәзәләр куелган. Ашханәдә дә өлешчә ремонт ясалган. Ремонт барышында мәктәп белән балалар бакчасы бер түбә астына алынды.

Үрәзмәттә ремонт башлаганда балалар бакчасы белән мәктәпне элеккеге контора бинасына урнаштырырга дигән карарга килделәр. Класс бүлмәләренә пластик тәрәзәләр куелып, откослар ясалган, түбә ябылган. Эчке эшләр дә төгәлләнү алдында. Район Башкарма комитеты җитәкчесенең инфраструктур үсеш буенча урынбасары Илнур Әхмәтов мәктәпләрдәге капиталь ремонт эше1 нче июльгә төгәлләнеп бетә дип хәбәр итә. Димәк, яңа уку елын яңа күлмәктән каршы алачак авыл мәктәпләре яңа уңышларга ныклы адымнар белән килә.

Лилия Шәймиева.