Патентны ничек иминият суммасына киметергә?

 Ялланып эшләүче хезмәткәрләре булмаган эшмәкәрләр салымнарын нульгә кадәр киметергә мөмкин. Ялланып эшләүчеләре булган шәхси эшмәкәрләр патентның бәясен иң күбе 50 про­центка кадәр киметә ала, ди ТР буенча Федераль салым хезмәтенең 11 санлы районара инспекци­ясе хезмәткәрләре.

– Ялланып эшләүчеләре булган эшмәкәр өчен патент буенча вычет күләмен исәплик. Вычет суммасы хезмәткәрләрнең мәҗбүри пенсия, со­циаль, медицина иминиятләштерүенә иминият взносларыннан; хезмәткәр авырганда хезмәткә яраксызлыкның беренче өч көн өчен эшмәкәр та­рафыннан түләнгән сумма; хезмәткәрләрне ире­кле шәхси иминиятләү буенча түләүләр; эшмәкәр өчен билгеләнгән күләмдә иминият түләүләре – 32448 сум ОПС һәм 8426 сум ОМС (2021 елның исәп чоры өчен); 300 мең сумнан арткан керем суммасыннан эшмәкәрнең Россия Пенсия фонды­на бер процентлы иминият түләүләреннән тора.

Мәсәлән, эшмәкәрнең 2021 ел дәвамында ике патенты бар: беренче патент – 1 гыйнвардан 31 мартка кадәр, икенчесе – 1 июльдән 30 сентябрьгә кадәр. Беренче хезмәткәрен эшмәкәр августта ял­лаган. Барлык патентлар буенча да салым сумма­сын киметүне сорап ул октябрьдә мөрәҗәгать итә. Салым органына тапшырган белдерү кәгазендә һәр патент буенча салым түләүченең билгесен күрсәтү каралган – физик затларга түләүләр һәм башка бүләкләүләр башкарамы. 50 про­цент чикләү бары тик икенче патент өчен генә гамәлдә, чөнки әлеге патент гамәлдә булган чорда ШЭ ялланган хезмәткәрләр хезмәтеннән файда­ланган. Беренче патент чорында хезмәткәрләр юк иде, шуңа күрә бу патентны чикләүсез киметергә була, – ди салым органы хезмәткәрләре.

Моннан тыш, югарыда язылганнардан чыгып, патентны киметү ягына узган елгы түләүләрне дә исәпләргә була (әгәр аларны агымдагы елда түләгән булсалар).

Патент буенча вычет алу өчен учетка куел­ган урын буенча салым органына белдерү кәгазе җибәрергә кирәк. Белдерү кәгазендә патент си­стемасын куллануга бәйле түләнелүче салым суммасын түләүләр һәм пособиеләр суммасына киметү турында күрсәтелә, дип хәбәр итәләр са­лым органы хезмәткәрләре.

Мөнирә Арсланова.

Фото – Pixabay.com