"Көн туса, иң элек тәрәзәгә күз салабыз: һава торышы ничек? Суытмаганмы? "Намус" агрофирмасы хезмәтчәннәре шулай ди.
Һава торышы белән кызыксынулары юкка түгел. Хуҗалыкта шикәр чөгендерен алу дәвам итә. Дөресрәге, чөгендерне төяп, Зәй шикәр заводына тапшыру бара.
"Намус" агрофирмасы быел 5135 гектар мәйданда шикәр чөгендере чәчте. Әйтүе генә ансат, озак еллар дәвамында эшкәртелми яткан басуларны кулланылышка кертү җиңел булмагандыр. Чәчү өчен әзерләгәндә басуларны ничә тапкыр, ничек эшкәрткәннәрен егетләр үзләре генә белә. Хезмәт бушка китмәгән. Чөгендер басуының һәр гектарыннан 500 центнер уңыш алганнар. Тамыразыкны җирдән чыгару хуҗалыкта бер ай элек төгәлләнде. Бүген басудагы чөгендерне Зәй шикәр заводына ташыйлар.
- Көненә 100әр рейс ясыйбыз. 50-60 "КамАЗ" чөгендер илтә", - ди агрофирманың баш инженеры Рафис Бәдертдинов. "КамАЗ"ларның барысы да "Намус"ныкы түгел анысы. Кайсы - инвестор "Агросила Групп" компаниясенеке, кайсыларын арендага алганнар. Чөгендер төяүче "Maus Ropa" погрузчиклары гына да ни тора ?! 40 кубометр сыйдырышлы "Amity"перегрузчикларына 32 тонна чогендер сыя .
Хәер, "Намус" агрофирмасының чөгендерне эшкәртү ысулы да америкалыларныкы бит. Америка ысулы үсентеләрнең рәт арасы киң булу белән аерыла.
- Бу, бердән, әлеге культура биләгән басуларны эшкәртү өчен уңайлы, икенчедән, кислород һәм углерод әйләнешенә файдалы. Рәт арасы киң булса да (56 сантиметр!), бер гектарга 140 мең үсенте туры килә, - ди баш агроном Эмиль Кәшәфетдинов.
Бүгенге көнгә агрофирма Зәй шикәр заводына 128 мең тонна чөгендер тапшырган. Озатасы да аз түгел. Тагын 120 мең тонналап чөгендер үз чиратын көтә.
- Чөгендернең җир өстендә ятуы сезгә файдага түгелдер?- дим.
- Тамыразыкның шикәрлелеге бүген 18 процент тәшкил итә, - ди Эмиль. - Кагат дөрес салынса, шикәр кимеми. Уңышны да югалтмыйбыз!
Киләсе елга агрофирмада тагын 5200 гектарда шикәр чөгендере утыртырга планлаштыралар. Чөгендер өчен җир, 30 сантиметр тирәнлектә эшкәртелеп, чәчү өчен әзерләп куелган. Гектарына 390 килограмм исәбеннән (физик авырлыкта) ашлама да кертелгән. Ә быел чөгендер биләгән мәйданнарда киләсе елда арпа белән язгы бодай үсәчәк. Бер өлешен, горчица чәчеп, сидераль парга калдырырга ниятлиләр. Ниятләре тормышка ашсын, дип телик. Зур хезмәт куеп, тир түгеп эшкәрткән басулар, быелгыча, мул уңыш белән куандырсын!
Римма Афзалова.
Автор фотосы
Иң мөһим һәм кызыклы язмаларны Татмедиа Telegram-каналында укыгыз
