Мөслим-информ

Мөслимлеләр 9 май бәйрәменә "Үлемсез полк" альбомын әзерли

Илебез халкы Бөек Җинүнең 72 еллыгын каршы алырга әзерләнә. Киләчәк буыннарга тыныч күк йөзе, бәхетле тормыш бүләк иткән бабаларыбызның батырлыгы - мәңгелек. Аларның рухлары алдында без - яшь буын башыбызны иябез һәм аларның батырлыкларын, тормыш юлын, истәлекләрен барлыйбыз.

Елдан-ел сирәгәя баручы ветераннар сафы, тыл ветераннары, сугыш чоры балалары безнең алдыбызга бу вазыйфаны бурыч итеп куя. Шушы максаттан чыгып, туган якны өйрәнү музее үзенең контакттагы төркемендә "Мөслим районының үлемсез полкы" дип исемләнгән альбом булдырды. Анда интернет челтәре ярдәмендә Бөек Ватан сугышы чорында яшәгән, катнашкан, үскән әби-бабаларыбызның истәлекле фотолары туплана. Фотолар тупланып кына калмыйча, аларның тарихы да өйрәнелә. Сугышчының исем-фамилиясе, яшәгән еллары, хәрби бүләкләре, батырлыгы турында мәгълүматлар җыела.

Бүгенге көндә альбомда 8 фотография һәм алардагы батыр сугышчылар турында белешмә урын алды. Яңа Усы авылыннан Смелов Аврам Леонтьевичның фотосын - оныкчыгы, Приют Шуран авылыннан Новиков Илья Петровичның фотоларын - оныгы, Кондратьев Прохор Ильичның мәгълүматларын килене Клара Кондратьева, Гәрәев Хуҗагали Тимергали улының фотосын Тукай районыннан туганнан туган сеңлесе тапшырды. Калган фотолар музей фондыннан куелды. Районыбыздан яу кырына киткән 8 меңнән артык якташыбыз, туган якларына кайта алмыйча ятып калганнар, исән-имин кайтып, сугыш яраларыннан вафат булган ветераннарыбыз өчен бу - бик аз сан! Хөрмәтле райондашлар! Үзебезнең туган төбәгебезнең батырларын барлау, аларның гаилә тарихларын, фронт юлын яшь буынга җиткерүдә сезнең зур ярдәм сорала. Гаилә архивында сакланучы фотоларыгызны, истәлекләрегезне туган якны өйрәнү музееның төркеменә урнаштырыгыз яки музейның фәнни хезмәткәре Равил Тимкинга тапшырыгыз. Сезнең бабайларыгызның якты истәлекләре буыннан-буынга күчәр һәм сакланыр!

Синара Яббарова,

туган якны өйрәнү музее директоры.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Реклама
Комментарии (0)
Осталось символов: