Мөслим телерадиокомпаниясе җиңүче

"Пирамида" мәдәни-күңел ачу комплексында ТР Экология һәм табигый ресурслар министрлыгы ел саен уздыра торган "ЭКОлидер" һәм "Кеше һәм табигать" республика конкурсларында җиңүчеләрне бүләкләү тантанасы булды.

Бүләкләү тантанасында ТР Премьер-министры Илдар Халиков, ТР Дәүләт Советы Рәисе урынбасары, ТР Журналистлар берлеге рәисе Римма Ратникова, ТР экология һәм табигый ресурслар министры Фәрит Абдулганиев, ТР Президентының парклар һәм скверлар мәсьәләләре буенча ярдәмчесе Наталия Фишман һәм башкалар катнашты.

"Бүген биредә әлеге мәсьәләләр һәм, гомумән, республикада бу юнәлештә башкарылган барлык эшләр дә мөһим булган кешеләр күп җыелган. Экология - ул тормыш, су, һава, туфрак һәм башкалар - бу без яшәгән мохит, һәм ул буш сүз генә түгел, - дип билгеләп үтте үзенең сәламләү чыгышында Илдар Халиков. - Конкурста меңнән артык кеше катнашуы бик яхшы", - диде ул.

Премьер җыелучыларга ТР Президенты Рөстәм Миңнехановның, республикада әйләнә-тирә табигый мохитне саклауның катлаулы, әмма шул ук вакытта беренче чираттагы бурыч, дигән сүзләрен искәртте.

Быел конкурс комиссиясенең эше бик катлаулы булган - бәйгегә 1 меңнән артык эш алынган, алар арасыннан иң яхшыларын сайларга кирәк булган. "Һәр эш татарстанлыларның экологик куркынысызлык мәсьәләләренә битараф булмавын күрсәтте", - дип ассызыклады ТР экология һәм табигый ресурслар министры.

"Иң яхшы телесюжет" номинациясендә Мөслим телерадиокомпаниясе җиңүче дип билгеләнде. Муниципаль районнар арасында Мөслим районы икенче урынны яулады.

"ЭКОлидер" конкурсы җиңүчеләре һәм призерларына дипломнар, конкурска эшләнгән сыннар һәм истәлекле бүләкләр тапшырылды.