Мөслим техникумы рестораторлар әзерли

Политехника техникумында 2021-2022 уку елында 196 егет һәм кыз белем алачак. Шуларның 56сы беренче курска килде.
Быел уку йорты өч яңа белгечлек тәкъдим итә: авыл хуҗалыгы техникасын һәм җиһазларны эксплуатацияләү, автотранспорт чараларын ремонтлау һәм хезмәт күрсәтү мастеры, пешекче-кондитер эше.  
– Авыл хуҗалыгы техникасын һәм җиһазларны эксплуатацияләү – урта звено белгечлеге, – ди политехника техникумы директорының уку-производство эше буенча урынбасары Илгиз Җиһангиров. – Әлеге белгечлек үз эченә тракторчы-машинист, “В” һәм “С” категорияләре буенча машина йөртүче һәм слесарь-ремонтлаучы һөнәрләрен ала. Уку вакыты – 3 ел 10 ай.
Әлеге белгечлекне алырга теләүчеләр байтак – 25 егет. Автотранспорт чараларын ремонтлау һәм хезмәт күрсәтү мастерына укырга теләүчеләр азрак – 18 кеше. Югыйсә, уку вакыты да азрак – 2 ел 10 ай. Әлеге белгечлек эшче профессия булып бара һәм егетләр машина йөртүче дә булып чыга.
Пешекче-кондитерларны техникум моңа кадәр дә әзерли иде. Аерма шунда: хәзер әлеге белгечлекне алу өчен 3 ел 10 ай укырга кирәк һәм, укып чыккан очракта, егет-кызлар пешекче-кондитер эше мастеры квалификациясен ала. “Рестораторлар булып чыгалар”, – ди Илгиз Җиһангиров. Булачак рестораторлар – тугызау.
Шунысын да әйтергә кирәк, соңгы елларда пешекче һөнәрен сайлаучылар арасында егетләр дә шактый. Политехника техникумында бу юнәлештә белем алучыларның сигезе – егетләр! 
Яңа белгечлекләр беренче курска килүчеләргә тәкъдим ителә. Шул ук вакытта тракторчы-машинист, эретеп ябыштыручы, пешекче-кондитер юнәлешендә дә укулар дәвам итә. 
– Мөмкинлекләр бар. Гыйлем алып, үз юлыгызны табыгыз, – диде район башлыгы Рамил Муллин техникум укучыларын сәламләгәндә. – Эшче һөнәрләргә бүген сорау зур. Сез сайлаган белгечлекләр буенча керемле эш табарга да, акча эшләргә дә була.
Техникум директоры Илнар Миргалимов укучыларны авырлыклар алдында куркып калмаска өндәде.