Мөслим картингчылары уңышка йөз тота

- Күпчелеге - Габдулла Тукай исемендәге Мөслим урта мәктәбе укучылары, - ди Рифкать Абдуллин. - Алар бик теләп йөриләр, картингчы белергә тиеш бар нәрсәне зур кызыксыну белән өйрәнәләр. Балаларның ярышларда катнашу теләге дә көчле. Картинг техник яктан куркыныч спорт төре булгач, ярышларда катнашу өчен ата-аналарның нотариуста расланган рөхсәте кирәк. Мондый документны берничә укучының гына әти-әнисе бирә алган. Ярышларда катнаша алмаган баланың түгәрәккә дә йөрисе килми башлыйдыр инде.

Мөслим картингчыларының беренче уңышлары да бар инде. Март аенда Буа районы башлыгы призына Казанда үткән ярышта Альбина Әхмәтҗанова кызлар арасында сигезенче урынны алды. Ике йөздән артык спортчы катнашкан чарада беренче унлыкка керү зур дәрәҗә санала. Альбина Габдулла Тукай исемендәге Мөслим урта мәктәбенең 6 классын тәмамлаган. Ул кечкенәдән үк күбрәк әтисенең шөгыльләрен үз иткән: техника белән кызыксынган, балык тоткан. Малайларның ушлары китә торган спорт төренә тартылуы да шуннандыр.

Картинг - зур чыгымнар сорый торган спорт төре. Аның өчен махсус трасса, зур ярышларда катнашу өчен узыш картлары (машина) кирәк. Безнекеләр әлегә стадионның йөгерү юлында узыша, картлары да гадирәк. "Трассабыз булса, нәтиҗәләребез тагы да әйбәтрәк булыр иде" - диләр яшь пилотлар.

Ярышларда катнашуда аларга район зур ярдәм күрсәткән. Иганәчеләр дә ярдәмнәреннән ташламыйлар. 31 май-1 июнь көннәрендә Казандагы "Форсаж" картинг клубында Татарстан беренчелеге кубогына узган ярышларда да чыгыш ясады мөслимлеләр.

- Анда республика районнарыннан 260 тан артык яшь картингчы катнашты. Безнең картингчылар Данил Мәүлиев, Рамил Кәлимуллин, Алмаз Камалов һәм Альбина Әхмәтҗанова уңышлы чыгыш ясадылар, - ди тренерлары Рифкать Абдуллин. Балалар һәм аларның тренеры ярышларда катнашу мөмкинлеге тудырган район Башкарма комитетына, эшмәкәр Нияз Габдрахмановка, "Наиком" ягулык салу станциясенә рәхмәтләрен җиткерәләр.

Мөнирә Арсланова.

Динар Минһаҗев фотолары.