"Мин Тукайны яратам" дип исемләнгән конкурс игълан ителә

Мөслим туган як музее бөек шагыйрь Габдулла Тукайның 130 еллыгына багышлап, кулдан ясалган эшләнмәләргә "Мин Тукайны яратам"дип исемләнгән конкурс игълан итә. Кул эшләрендә кулланылган материаллар ирекле - балчык, кәгазь, тукыма, папь-маше, камыр, җепләр, йон һ.б. Эшләр күләмле, үзенчәлекле һәм куелган теманы ачарга тиеш. Конкурска килгән эшләр 21 апрель көнне музейның күргәзмәләр залына куелачак. Конкурс нәтиҗәләре буенча иң яхшы кул эшләре билгеләнәчәк, призлы урыннарга лаек булучыларга Мактау грамоталары һәм истәлекле бүләкләр тапшырылачак. Конкурска йомгак 2016 елның 25 апрелендә ясала. Эшләрне 15 апрельгә кадәр тапшырырга кирәк.