Мөслим-информ

Коронавирус беркемне дә аямый

Коронавируска бәйле вәзгыять кискенләшү сәбәпле район хастаханәсенең икенче катында йогышлы авырулар бүлеге ачылды

Бүлектә 45 авыруга урын әзерләнгән. Хастаханәдә алты кислород концен­траторы бар, бу атнада тагын 10 кон­центратор кайтырга тиеш. Кирәкле җиһазлар белән тәэмин итүдә игеле­кле эшмәкәрләрнең ярдәме зур. Алар – “Агромастер” җитештерү компаниясе җитәкчесе Илгиз Исламов һәм “Август-Мөслим” компаниясе җитәкчелеге.

– Бүген бүлектә 39 авыру ята. Күбесе бик авыр хәлдә һәм кислородка тоташты­рылган. Кислород концентраторларының барысы да – кулланылышта. Коронавиру­ска бәйле вәзгыять тагын да кискенләште. Үпкәләре ясалма җилләтү аппаратына то­таштырылган авыруларның хәле кинәт на­чарланырга мөмкин. Авыручылар саны арта бара, – ди район үзәк хастаханәсенең терапия бүлеге мөдире Камил Хәлиуллин.

Сигез райондашыбыз Мөслимнән читтә – шәһәр хастаханәләрендә дәвалана. Авыручыларның шәһәр хастаханәләренә барасы килми, күпчелек район хастаханәсендә дәвалануны ку­лай күрә. Ел дәвамында 237 райондашы­быз Казан, Яр Чаллы, Әлмәт шәһәрләре хастаханәләрендә дәвалану узган. Быел җирлегебездә 69 кешегә Ковид-19 диагно­зы куелган, шуларның 14е вафат булган.

Иске Вәрәш авылында гомер итүче Флүзә Җиһангирова да район хастаханәсендә дәваланган. Флүзә апага – 66 яшь. Бу чир аның бөтен якыннарын аяктан еккан.

− Чирне кайда йоктырганымны да бел­мим. Җиде көн югары температура белән өйдә яттым. Үзлегемнән дәвалану ярдәм итмәгәч, балалар Әлмәткә томографиягә алып китте. Үпкәләрнең җиңел формада – 25 процент зарарлануы билгеле булды. Са­турация яхшы булгач, хастаханәгә салмады­лар. Икенче көнне сатурация кинәт төште һәм мине район хастаханәсенең йогышлы авырулар бүлегенә салдылар. Өч көннән соң Яр Чаллыга томографиягә алып бардылар. Үпкәләрем 84 процент зарарланган иде, – дип искә ала Флүзә апа. – Әле дә, күбрәк эшләсәм, кислород кирәк була, шуны сулап алам. Аны, хастаханәдән чыгу белән, бала­лар заказ биреп кайтарды. Берәүгә дә авы­рырга язмасын! Бик куркыныч чир. Таби­бларга рәхмәт, аякка бастырдылар.

– Савыгып, үз аякларында өйләренә кайтып китүче райондашларыбызны күрү – безнең өчен зур куаныч! Күпләр бүлеккә сулыш алулары авыраеп, ютәл, тамак авыр­ту, югары температура белән керә. Ис һәм тәм тоймаучылар да күп. Кемдер вирусны атна-ун көн эчендә җиңә, кемдер 20-35 көн ята. Авыруның чирне ничек кичерүе орга­низмнан тора, – ди хастаханәнең йогышлы авырулар бүлеге шәфкать туташы Валенти­на Шәйхетдинова.

Район хастаханәсенең баш табибы Да­нияр Якупов сүзләренә караганда, коро­навирусны кичергән кешеләрдә, авырудан терелгәч тә, хәлсезлек күзәтелергә мөмкин. Кызу атлап йөргәндә, физик активлык ва­кытында сулыш алуда кыенлыклар булса, курыкмагыз!

– Ковид-19 авыруыннан соң (терелгәннән соң да!) ютәл күзәтелергә, авыздан какырык килергә, аппетит юга­лырга мөмкин. Ләкин температура булыр­га тиеш түгел! Әлеге симптомнар ике атна дәвамында күзәтелсә, табибка мөрәҗәгать итәргә кирәк. Бер авыру да эзсез узмый, монысы бигрәк тә. Организмны тулысын­ча тергезү өчен дөрес туклану, витаминнар эчү, сулыш гимнастикасы ясау мөһим, – ди Данияр Якупов.

Ә авырудан саклану өчен вакцинация ясатырга кирәк. Вакцинацияләнүчеләр, чирләгән очракта да, авыруны җиңел кичерә.

– Ел башыннан поликлиникага 10090 дозада вакцина кайтты. Авыру таралу­ны киметү өчен без 12190 кешегә коро­навируска каршы прививка ясарга тиеш­без. Әлегә план 82,7 процентка үтәлде. Шушы көннәрдә тагын 1500 доза вакцина кайтты. Прививка ясаткан райондашла­рыбыз үзләрен яхшы хис итә, – ди район хастаханәсенең баш табибы Данияр Яку­пов.

Лилия Шәймиева.

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Реклама
Комментарии (0)
Осталось символов: