Керем артыннан куып - авылдашларын гүргә кертүчеләрдә бар

Соңгы вакыт­та спиртлы эчемлекләр белән сәүдә итүче райондашларыбызның кыңгыр гамәлләре ешрак ачыла башлады кебек. 6 июль көнне ТР Дәүләт ал­коголь инспекциясенең Түбән Кама территориаль органына Мөслим райо­нында шәхси эшмәкәрлек белән шөгыльләнүче Р. Вәлиевне җаваплылыкка тарту буенча материал керә. 1 июнь көнне рай­он эчке эшләр бүлеге хезмәткәрләре рейд ва­кытында Югары Табын авылының Татарстан ура­мында "Ока" маркалы ма­шинаны туктата. Руль ар­тында Р. Вәлиев була. Тикшерү вакытында ма­шина багажнигындагы азык-төлек товарлары һәм сыра астында яшерелгән 320 флакон этил спирты табыла. Дәүләт алкоголь инспекциясе белгеченең "Этил спиртын кайдан са­тып алдыгыз һәм нин­ди бәядән?" дигән сора­вына Р. Вәлиев: "Яр Чал­лы шәһәреннән", - ди һәм канәгатьсезлек белән: "Лосьоннарның бәясе дә арткан - 9 сумнан 15 сум­га әйләнгән", - дип өстәп куя. Шулай күп күләмдә спирт алуның макса­тын сорагач, ул: "Шәхси ихтыяҗларым өчен һәм хуҗалык эшләрендә ярдәм иткән авылдаш­ларны сыйларга", - дип җавап бирә. Эшмәкәргә, әлеге "сыеклыкны" авыл­дашларга тәкъдим итеп, сәламәтлекләренә зур зыян китерүе хакында җитди дәллилләр китергәч, Р. Вәлиев мондый спирт­лы эчемлекне башка алып кайтмаячагына вәгъдә бирде.

Акча, байлык артын­нан куып, авылдашла­рын, күршеләрен агулап, гүргә кертүчеләр очрап тора. Тик тормыш шун­дый нәрсә, явызлык та, ях­шылык та бумеранг ке­бек кире әйләнеп кайта. Әлеге административ хо­кук бозу турындагы мате­риал Казан шәһәренең Ар­битраж судына җибәрелде. Закон бозуның әлеге очра­гы буенча физик затларга - 10-15 мең, юридик затлар­га 200-300 мең сумга кадәр штраф каралган.

Миләүшә ЗӘКИЕВА