Казанда узган ифтар мәҗлесендә Мөслимннән 50 кешелек делегация катнашты

Казан теннис академиясендә бишенче республика ифтары үтте. Мәҗлескә 10 меңгә якын кеше җыелды. Ифтарда республика мөфтие Камил хәзрәт Сәмигуллин, Татарстан Президенты Рөстәм Миңнеханов, ТР Дәүләт киңәшчесе Минтимер Шәймиев тә катнашты. Быел беренче тапкыр бу чарага Казан һәм Татарстан митрополиты Феофан һәм республиканың баш раввины Ицхак Горелик та кунак итеп чакырылган иде.

Ифтар Коръән сүрәләре уку белән башланды. Вакыт кергәч, җәмәгать белән ахшам намазы укылды, мәҗлес табын артында дәвам итте. Бишенче республика ифтарында безнең районнан 50 гә якын дин кардәшебез катнашты.