Катмышлылар чишмә суы эчәчәк

Мөслим авыл җирлегенә керүче Катмыш авылы үзәккә терәлеп үк диярлек урнашса да, биредә чиста су проблемасы хәл ителмәгән иде. Авыл халкы да әлеге сорау белән күп тапкырлар мөрәҗәгать итте. Ниһаять, быел әлеге мәсьәлә хәл ителде. Катмышта үзара салым акчалары хисабына 1 км 900 метр озынлыкта су линиясе ясалды, өч урында янгын гидрантлары урнаштырылды. Авылга су Ташлыяр авылы чишмәсеннән киләчәк. Катмышта су линиясен файдалануга тапшыру тантанасы 20 октябрьдә узачак.