Качману – чистарыну, дигән сүз
Рус Шуган авылында Качману бәйрәме үтте. Бәйрәмдә район башлыгы урынбасары Азат Әхмәтҗанов катнашты.
19 гыйнварга каршы төндә православие динендәгеләр Крещение – Качману бәйрәмен билгеләп үтә. Бу көнне Рус Шуган авылында кичтән, чиркәүгә барып, гыйбадәт кылалар һәм махсус урында су коеналар. Шул рәвешле православие динен тотучылар “тәнгә – сихәт, җанга шифа алабыз, гөнаһлардан, чирләрдән арынабыз” дип ышаналар.
– Борынгыдан килгән гадәт буенча 19 гыйнварга каршы төнне халык чиркәүдә гыйбәдәт кыла һәм төннең икенче яртысында су керә башлый. Бу көнне чиркәүләрдә су изгеләндерелә, коену өчен елга- күлләрдә бәке ясала. Бәйрәм көнне чиркәүдән изгеләндереп алып кайткан су сихри көчкә ия дигән ышану яши. Бу көнне җыелган су, күпме вакыт торса да, бозылмый, – ди Рус Шуган авыл җирлеге башлыгы Альбина Басорина.
Бәйрәмгә җыелучыларны иң элек Никита атакай сәламләде. Район башлыгы урынбасары Азат Әхмәтҗанов район Советы һәм Башкарма комитеты исеменнән Качману бәйрәме белән тәбрикләде, изге теләкләрен җиткерде.
Бәйрәмнең рәсми өлешеннән соң, Никита атакай суны изгеләндерде. Бәкегә төшүчеләр, кагыйдә буларак, өч тапкыр суга чумып алырга тиеш иде. Быел да салкын суга беренчеләрдән булып райондашыбыз Петр Осетрин чумды.
– Качмануда ел саен су коенам. Суның салкынлыгын сизмим, җанга шифа алгандай булам. Ел дәвамында авырмавымның сәбәбе дә Качмануда коенуыма бәйле, дип уйлыйм. Бу көнне су керүне тәнем ел буе көтә. Коенып чыккач, үзеңне яңа туган баладай хис итәсең. Качмануда су коену минем өчен татлы хыял кебек, – ди Петр Осетрин.
– Качмануда елга яки күлдә су коенсаң, бик күп гөнаһлардан арынасың, күңел чистарына, төрле чирләрдән дәва аласың, дигән ышану яши. Мин, татар булсам да, шушы ышану белән яшим. Быел да Рус Шуган авылының Шумбут күлендә су коендым. Әниемнең дә барасы килгән иде, – ди район поликлиникасы кардиологы Тәнзилә Зиннурова.
К ач м а н у б ә й р ә м е н д ә изгеләндерелгән суны өйләренә алып кайтып, ел буе саклаучылар бар. Су ничә ел торса да, бозылмый, диләр. Шумбуттан православие динендәгеләр генә түгел, башка милләт вәкилләре дә изгеләштерелгән су алды. Чир заманасы бит. Халыкның авырулардан арынырга теләве гаҗәп түгел. Ә су – чисталык билгесе. Аның сихәт көченә ышанучылар күп.
– Качману көнне бөтен кеше су керергә тиеш, әмма бу – һәркемнең үз ихтыярында. Изге көнне су коенуны халык шифа буларак кабул итсен иде. Җаннарыбыз да, уйларыбыз да камил булсын! – ди Рус Шуган авылыннан Михаил Маланчев.
Лилия Шәймиева.
Автор фотосы.
Иң мөһим һәм кызыклы язмаларны Татмедиа Telegram-каналында укыгыз
