Интернетта Нурбәк Батулланың “Сизәсезме вәзгыятьне? Киеренкелек!” дигән чыгышы популярлаша

(Казан, 15 сентябрь, «Татар-информ», Рузилә Мөхәммәтова). Facebook социаль челтәрендә Нурбәк Батулланың "Сизәсезме вазгыятьне? Киеренкелек!.." чыгышының видеосын бер тәүлектән дә азрак вакыт эчендә 2500дән артыграк кеше караган һәм алтмышлап кеше үз лентасына күчергән.

"Татар-информ" мәгълүмат агентлыгында биюче Нурбәк Батуллин катнашында "Әлиф" хореографик спектакленә багышланган матбугат конференциясе узган иде. Биредә Нурбәк Батулла Татар теле тирәсендәге проблемалар буенча үз фикерен белдерде, аларны чишәр өчен киеренкелектән котылырга кирәклеген әйтте. "Без хәзер тел мәсьәләсендә артык куерта башладык. Ана телебез тирәсендәге проблеманы чишәр өчен, безгә, киресенчә, иркенәергә кирәк... Интернет челтәрләренә килеп керсәң дә, анда да киеренкелек. Ә бит безгә елмаерга, иркенәергә кирәк! Тирән бер сулыш алыйк! Биик, эзләник, ялгышыйк! Бу иркенлек, әлбәттә, ниндидер корбан таләп итә. Без дүрт хәрәкәтне ташларга, биш җырны онытудан курыкмыйбыз. Яңа юллар эзлибез. Ялгышырга да мөмкинбез, ләкин без бәреп чыгарга тырышабыз", - диде ул.