Игелек кыл да суга сал!

 Инвалидлар ункөнлегенең иң зур, иң мөһим вакыйгасы – Хәйрия марафоны. Ник дигәндә, әлеге чара райондагы барлык оешма- предприятиеләрне колачлый, мөмкинлекләре чикле район­дашларыбызга һәркем кулыннан килгәнчә ярдәм кулын суза. Хәйрия марафонының исеме дә “Без бергә” бит!

Хәйрия марафонын район Башкар­ма комитеты җитәкчесенең беренче урынбасары Рафаэль Демидов ачты. “Игелекле эшләребез ункөнлек белән генә чикләнмәсен иде”, – диде ул, ма­рафонда катнашучыларны сәламләп. Районның имам-мөхтәсибе Илгиз хәзрәт Сөнгатуллин Аллаһы Тәгаләнең без – адәм балаларына биргән нигъмәтләре турында искәртте. “Ко­лакларыбыз белән ишетә, күзләребез белән күрә алабыз. Ис, тәм тою да – нигъмәт. Шушы нигъмәтләрдән фай­далана алмаучы кешеләр дә бар бит”, – диде хәзрәт, мөмкинлекләре чикле кешеләр турында искәртеп.

Марафонда районыбызның хөрмәтле шәхесләре, рай­он үзешчәннәре чыгыш ясады. Мөмкинлекләре чикле булса да, авыр­лыклар алдында югалып калмаган көчле рухлы райондашларыбыз турын­да Мөслим телевидениесе әзерләгән сюжетлар күрсәтелде. Сәламәтлекләре чикле райондашларыбызның кул эшләреннән күргәзмә дә әзерләнгән иде. Нәрсә генә юк иде анда: хуҗалык товарлары, оек-бияләйләр, үлән чәйләре, картиналар, кәрҗиннәр... Марафонда катнашучылар товар­ларны яратып алды. Сатып алучы­лар шул рәвешле үзләренең инвалид­ларга ярдәм итә алуларына сөенде. Мөмкинлекләре чикле райондашла­рыбыз башкаларны шатландыра алу­ына сөенгәндер.

– Инвалидлар ункөнлегендәге ча­ралар мөмкинлекләре чикле рай­ондашларыбызны актив тормыш алып барырга чакыру, аралашу өчен мөмкинлекләр тудыру максатында оештырыла. Бу инвалидлар да үз хо­кукларыннан сәламәт кешеләр белән тигез дәрәҗәдә файдалансын өчен эшләнә. Мөмкинлеге чикле райондаш­ларыбыз кыенсынмасыннар, мәдәни һәм спорт чараларына йөрсеннәр иде, – ди иҗтимагый совет рәисе Рушат Солтанов.

Район үзәк китапханәсе хезмәткәрләре картлар һәм инва­лидлар йортында һәм Түбән Табын сәламәтлек мөмкинлекләре чикле балалар өчен интернат-мәктәбендә “Могҗизалар кыры” уенын оештырды. Әлеге чарада катнашкан өлкәннәр дә, балалар да, уңышларына чын-чынлап сөенеп, уенның үзен могҗизага тиңләде. Интернат-мәктәптә тәрбияләнүчеләр ГТО нормативла­рын да тапшырды. Балалар турникта һәм идәннән күтәрелү, туп ату, озын­лыкка сикерү, йөгерү, алга иелү буенча көчләрен сынады. 24 бала катнашкан спорт бәйгесендә җиңелүчеләр бул­мады. Укучылар үз уңышларына да, иптәшләренекенә дә бердәй сөенүләре белән сокландырды.

4 декабрьдә инвалидлар ункөнлеге кысаларында ярминкә гөрләде. 7 декабрьдә мәктәпләрдә “Тормыш безгә игелекле эшләр өчен бирелгән” исем астында тормыш дәресләре үтте. Бу көнне мәктәпләрдә ярминкәләр дә оештырылды һәм аннан кергән акча инвалидларга ярдәм итү өчен тотыл­ды. Ункөнлек дәвамында чәчтарашлар, җәмәгать мунчасы, “Тамчы” бассейны, кинотеатр бушлай хезмәт күрсәтте. Бүгенгә кадәр мунча хезмәтеннән 22 кеше файдаланган. Бассейнда су керү, кинотеатрда бушлай кинофильмнар карау мөмкинлеген кулланучылар бул­маган.

Инвалидлар ункөнлеге кысала­рында мөмкинлекләре чикле рай­ондашларыбызга күчтәнәчләр китерүчеләр дә аз түгел. Азнакай эшмәкәре, Баланлы авыл җирлеге депутаты Алгиз Корбанов Баланлы­да яшәүче сигез кешене күчтәнәчләр белән сөендергән. Андый эшмәкәрләр аз түгел, дип беләбез.

– Мөслимдәге картлар һәм инва­лидлар йортында 50 кеше тәрбияләнә. Инвалидлар ункөнлегендә өлкәннәр өчен төрле чаралар оештырылды. Картлар йортына даими ярдәм итүче Кадрия һәм Илгиз Исламовларга, Ро­залия Габдрахмановага һәм башка райондашларыбызга зур рәхмәт! – ди Гөлнар Шакирьянова.

– Сәдака малны киметми, артты­ра гына. Сәдака биргән саен малы­бызга бәрәкәт иңә, ул малны чистар­та, – ди Илгиз хәзрәт. – Ә башкалар­га ярдәм итү ул – бердәмлек, кайгыр­ту билгесе, Раббыбызга карата шөкер итүебезне күрсәтә.

Шуны аңлап, башкаларны сөендерә белгән, матур гамәлләре белән савап алган райондашларыбыз­га рәхмәт! Әмма изге эшләр, игелекле гамәлләребез ункөнлек белән генә чикләнмәсен, дәвамлы булсын иде.

Римма Афзалова.

Автор фотосы.