Мөслим-информ

Муслюмовский район

18+
2024 - Гаилә елы
Яңалыклар

Хезмәт кенәгәләренә “Үз теләге белән эштән китте” дип язуга да каршы эшчеләр

Олы Чакмак авылы мәдәният йортында җыелыш узды. Анда район башлыгы Рамил Муллин, район активы, авыл халкы катнашты. Биредә "Мөслим" агрофирмасының банкротлыкка чыгу читенә җитүе хакында сөйләшү булды. Ә бу хуҗалыкта хезмәт куючы сыер савучылар, механизаторлар - 100дән артык кеше эшсез калды дигән сүз.

Кайчандыр гөрләп торган хуҗалыкның бөлгенлек сызыгын үтеп, терлек торакларына амбар йозаклары салынуы биредә җитәкчелек иткән хуҗаның дөрес эш алып бармавын да ишарәли. Гыйнвар аеннан алып хезмәт хакын күрмәгән савымчылар да, терлекчеләр дә зар елый.

Халыкның ризасызлыгы аңлашыла да. Көн дә кирәкле булган ипи-чәй, башка кирәк-яракларны алыр өчен бер тиен акчаң булмаганда, моңа өстәп ай да исәп-хисап ясау мәҗбүри булган коммуналь түләүләрне исәпләгәндә, халык тишек тагарак алдында калды.

Олы Чакмак, Сал.Мухан, Баланлы, Шуганка, Ташлыяр, Михайловка бүлекчәләрен үз эченә алган "Мөслим" агрофирмасына, дөресен генә әйткәндә, ныклы куллы җитәкче кирәк! Авыл халкы сүзе белән әйтсәк, "киләләр дә ташлап китәләр" кебек булмасын!

Хезмәт кенәгәләренә "Үз теләге белән эштән китте" дип язуга да каршы эшчеләр. Мәҗбүри өйдә утырырга тиеш булган апа-абыйлар алай эшләгәндә бер тиен дә акча алалмыйлар булып чыга. Бу мәсьәләдә дә ачыклык кертте район башлыгы. "Халыкны җәберләүгә юл куймыйк. Кирәкле документларны теркәгәндә аларга ярдәм күрсәтелсен", - диде. Кенәгәләргә "Эштән кыскартылды" дигән язу сырланганда, аларга күпмедер вакыт акча түләнәчәк. Алынмаган хезмәт хаклары да тиененә кадәр түләнәчәк дип ышандырдылар халыкны. Тик бөтен гомерен хуҗалыкка багышлап, авыл тормышы белән яшәгән апа-абыйлар өчен бу баланы кәнфит биреп алдау кебек кенә. Пенсиягә чыгарга санаулы еллар гына калганда, алар хәзер каяндыр эш эзләргә мәҗбүр. Ә 50дән узганнарны, үзегез беләсез, эшкә алам дип торучылар юк. Мәсьәлә шушы җирлектә бушап калган терлек торакларын мөгезле эре терлек белән тутырып, халыкны эш белән тәэмин итеп, вакытында хезмәтенә күрә акчасын түләп бара торган хуҗа килгәч кенә чишелер кебек.

Лилия Шәймиева

Следите за самым важным и интересным в Telegram-каналеТатмедиа

Безнең телеграм каналга кушылыгыз! Телеграм-канал

Без "Дзен"да! Дзен


Оставляйте реакции

0

0

0

0

0

К сожалению, реакцию можно поставить не более одного раза :(
Мы работаем над улучшением нашего сервиса

Нет комментариев

Реклама
Реклама
2
X