Реклама
Яңалыклар
Горурланабыз!
Татарстанның беренче Президенты Минтимер Шәймиевкә 20 гыйнварда 85 яшь тула.
Минтимер Шәймиев хезмәт юлын Мөслим РТСында башлый. Алай гына да түгел, Мөслимдә эшләгән чорда гаилә кора, Сәкинә белән Минтимер Шәймиевләрнең беренче уллары Айрат Мөслимдә туа. М.Шәймиев белән бергә эшләгән кешеләр күңелендә беренче президентыбыз турында матур истәлекләр яши.
Минтимер Шәймиев Мөслимгә 1959 елны, Казан аграр институтының механикалаштыру факультетын тәмамлагач, юллама буенча килде һәм ремонт-техника станциясендә башта – инженер, аннан соң баш инженер булып эшләде. Ул районда югары белемле беренче инженер иде дисәм дә, ялгыш булмас.
Мин Чистай авыл хуҗалыгы техникумында укыган вакытта РТСка практикага кайттым. Минтимер Шәрипович мине Калинин исемендәге, “Авангард”, “Победа” һәм Тукай исемендәге колхозларны берләштергән участокка механик итеп беркетте. Минтимер Шәймиев эш дип янып эшләде, кул астындагылардан да шуны таләп итте. Колхоз-совхозларның техникасын төзек тоту буенча эш белән бергә ул бик күп яңалыклар да кертте. Ул чорда техниканы ремонтлаганда кирәкле детальләр ясау өчен станоклар җитми иде. Минтимер Шәриповичның тырышлыгы белән РТСка фрезерлы станок кайтарылды. Бу ремонт эшен шактый җиңеләйтте. Станокта ясалган шестернялар заводныкыннан ким булмый иде. Әлеге станок бик күп еллар хезмәт итте, хәзер дә эшли. “Агромастер” компаниясендә аны улым Илгиз файдалана.
Минтимер Шәймиев эшләгән елларда районга дизель двигательле ДТ-54 тракторлары кайта башлады. Бу авыл хуҗалыгындагы эшләрне җиңеләйтергә мөмкинлек бирде. Әмма тракторның рамасы бик тиз сафтан чыга иде. Минтимер Шәрипович республикада беренчеләрдән булып РТСта шул рамнарны өр-яңадан ясауны оештырды.
Ул безнең районда эшләгән елларда республикада кукурузны квадрат-оя ысулы белән чәчәләр иде. Гамәлдәге чәчкечләр квадратларны дөрес ясап бетерми иде. Минтимер Шәрипович, бик озак эзләнеп, санап-сызып эшләгәннән соң чәчкечләрне реконструкцияләде. Нәтиҗәдә квадрат оялар тиешенчә сызылды һәм рәт араларын эшкәртү дә уңайланды. Ул елларда безнең район кукурузның яшел массасын уру буенча республикада алдынгы урыннарны яулады.
Минтимер Шәрипович безнең җирлектә эшләгән еллар машина-трактор паркларының үсү чоры иде. Әмма кайткан техника белән идарә итәргә механизаторлар җитми. Яшь баш инженер бу мәсьәләне дә хәл итү җаен тапты. Мөслим РТСында дүрт айлык механизаторлар курслары эшли башлады. Укулар белән Минтимер Шәрипович үзе җитәкчелек итте.
Ремонт-техника станциясе терлекчелек тармагын механикалаштыруга да өлешен кертте. Монда да Минтимер Шәймиевнең осталыгы, сәләте ярдәмгә килде. Ул чорда фермаларны су белән тәэмин итүче башнялар җитәрлек түгел иде. РТСта колхоз-совхоз фермалары өчен су башнялары җитештерү дә җайга салынды. Читәннән үрелгән ферма тораклары урынына заманча терлекчелек тораклары төзелә башлады. Кирпечтән салынган бинаның яшь терлекләр бүлеген җылыту кирәк булды. Инженер Минтимер Шәймиев тәкъдиме белән утын ягып җылытылучы калориферлар ясалды. Алардан чыккан һава яшь терлекләр бүлеген җылытты.
Минтимер Шәймиев Мөслимдә эшләгән елларда авыл хуҗалыгы үсешенә зур өлеш кертте. Эшкә сәләтле, уйлап табучы һәм рационализатор, һәркем белән уртак тел табып, яхшы мөгамәләдә эшләүче яшь белгечне югарыда да бик тиз күреп алдылар һәм Минзәлә районы ремонт-техника станциясенә җитәкче итеп эшкә күчерделәр. Анда ул 1962 елдан 1967 елга кадәр эшләде.
Кайда гына эшләсә дә, без Минтимер Шәрипович белән һәрвакыт элемтәдә булдык. Аны чын күңелдән юбилее белән котлап, сәламәтлек, озын гомер, улларының игелеген күреп, һаман да шулай республика мәнфәгатьләрен кайгыртып яшәвен телим.
Зәки Исламов.
Следите за самым важным и интересным в Telegram-каналеТатмедиа
Безнең телеграм каналга кушылыгыз! Телеграм-канал
Нет комментариев