Эшләүчеләрнең пенсиясе 1 августтан арта

Пенсия күләмен кабат исәпләгәндә арту өч пенсия коэффициенты белән чикләнгән. 2021 елда бер коэффициентның бәясе 98,86 сум тәшкил итә, ягъни акча эквивалентында ул 296,58 сумнан артмый. 
Пенсия арту индивидуаль: аның күләме эшләүче пенсионерның узган елда алган хезмәт хакына бәйле, ягъни эш бирүче тарафыннан күчерелгән иминият взнослары суммасына һәм исәпләнгән пенсия коэффициентына. 
Пенсия һәм социаль түләүләр турында тулырак мәгълүмат Социаль тәэминатның бердәм дәүләт мәгълүмат системасы (ЕГИССО) сайтында урнаштырылган. Һәр пенсионер үзенең пенсия эшендәге үзгәрешләрне мөстәкыйль күзәтә ала. Бары тик дәүләт хезмәтләре порталыннан (www.gosuslugi.ru) пароль белән ЕГИССО (egisso.ru) шәхси кабинетына керергә кирәк. 
– Пенсионер эштән китсә, өч айдан соң пенсия фонды автомат рәвештә пенсияне кабат исәпләячәк. Мәсәлән, гражданин 30 июньдә эштән китсә, октябрь аенда аның пенсиясе арта. Әмма кабат исәпләү ул эштән киткән айдан соң килүче айның 1 числосыннан ук башкарыла. Һәм арткан пенсиясен барлык индексацияләре белән ул өч ай үткәч (октябрьдә) алачак, – ди Мөслим районында клиентларны кабул итү хезмәте җитәкчесе Фәридә Ганиева.