“Бергә булганда – таулар күчерербез”

Юкка гына аларны халыкка иң якын торган хакимият структура­сы дип әйтмиләр. Җирле үзидарә хезмәткәрләре – халыкның гозер- үтенечләрен тыңлап, киңәш бирүче дә, булган проблемаларын чишүче дә.

– Рус Шуган авыл җирлеген башка­ларга да үрнәк итеп куяр идем. Монда авыл җирлеге башлыгы да, халкы да, де­путатлары да, гомумән, нинди социаль объектлар бар – барысы да кулга-кул то­тынып, бердәм булып яшиләр. “Моны­сы – синеке, монысы – минеке”гә бүлеп тормыйча, уртага салып, бер йодрык­ка тупланып эшли белүләре – матур күренеш. Балаларын да үзләре үрнәгендә үстерәләр. 90 процент татар яшәгән рай­он җирендә үз телләрен, милли традиция һәм гореф-гадәтләрен саклап яшиләр, – ди район башлыгы урынбасары Азат Әхмәтҗанов.

Җирлекнең бүгенгесе, киләчәге бе­ренче чиратта аның башлыгына да бәйле. Альбина Басорина Рус Шуган авыл җирлеген 2018 елдан җитәкли. Өч ел дәвамында җирлектә бик күп ма­тур үзгәрешләр булды. Альбина өчен җирлек күптәннән чит-ят түгел инде. Гаиләләре белән 31 ел элек Әлмәт райо­ны Кәләй авылыннан Рус Шуганга күчеп кайталар. Ул вакытта 15 яшьлек Альби­на Мөслимдәге һөнәр училищесында балалар бакчасы тәрбиячесе һөнәрен үзләштерә. Рус Шуган авылының “Зер­нышко” балалар бакчасында 23 ел тәрбияче булып эшли. Шул ук вакытта Альбина Юнысовна Яр Чаллы шәһәренең педагогия институтында читтән то­рып югары белем ала. Бакчада эшләү белән беррәттән Альбина Рус Шуган мәктәбендә балаларга татар теле һәм әдәбияты фәннәрен укыта башлый.

– Рус Шуган авыл җирлеге халкының кунакчыллыгы, дус яшәве бер күрүдә күңелемә май булып ятты. Унси­гез яшемдә шушы авыл егете Сережа­га кияүгә чыктым, бер-бер артлы ба­лалар алып кайттык. Җирлек башлы­гы булып эшли башлаган чорда җиңел булмады, билгеле. Бу – зур җаваплылык таләп итүче тармак. Авыл халкының тор­мыш шартларын җиңеләйтү, килеп туган мәсьәләләрне чишү, шәхси сорауларны хәл итүдә булышу – барысы да вакыт һәм көч таләп итә. Безнең бурыч – халыкка тормыш алып бару, яшәү һәм эшләү өчен мөмкинлекләр, уңайлыклар булдыру. Җирлек халкы бердәм безнең. Ә бу бик тә мөһим. Бербөтен булып эшләгәндә тау­лар күчереп була, – ди Альбина Басорина.

Островка, Тат. Смыловка, Иске Смы­ловка һәм Рус Шуган авыллары керүче Рус Шуган авыл җирлегендә бүгенге көндә 448 кеше яши. Мәктәп, балалар бакчасы, почта бүлекчәсе, мәдәният йор­ты, китапханә, ике фельдшер-акушер­лык пункты, ике кибете булган җирлектә гаилә фермалары да калка башлады. “Авылның киләчәге бар!” – ди җирлек башлыгы. Иң мөһиме: җирлек халкы да бу фикерне хуплап яши.

Лилия Шәймиева.

Фото – Альбина Басоринаның шәхси архивыннан.