Белмәсәң - бел: чәч сынса нишләргә дә, ничек ярты сәгатьтә тәртип ясарга

· Чәч сына, коела башласа, чәч төбенә тоз ышкыгыз да, җылы су белән юып төшерегез. 5-6 тапкыр шулай эшләгез. Процедураны атнага 2-3 мәртәбә кабатларга кирәк. Ике атнадан чәчнең ныгыганын, сәламәтләнгәнен сизәрсез.

· Ирен тиресе корып ярылса, көнгә берничә мәртәбә кыяр согы сөртегез. Йоклар алдыннан бал сөртегез. 15 минуттан юып төшергәч, туендыручы крем кулланыгыз. 1 чәй кашыгы эремчеккә шул ук күләмдәге кишер согы кушып болгатканнан соң, 20 минутка иренгә сөртеп тору да зыян итми.

· Үзеңне ярты сәгатьтә тәртипкә китерү өчен, иң элек контраст душ керергә кирәк. Җылы су тәнне җылытса, салкыны барлык нерв күзәнәкләрен уята.

· Кәефне кара шоколад күтәрер. Аңарда бәхет гормоннары бар. Колакка массаж ясарга була. Аның өчен колакның йомшагын уарга кирәк.

· Күз төбендәге "түгәрәкләр"дән арынырга бәрәңге ярдәм итәр. Аны уыгычтан чыгарып, күз кабагына куялар. Моның өчен пакетлы чәй файдаланырга да мөмкин.

· Майланган чәчне 1:1 нисбәтендә су кушылган лимон согында чылатылган щетка белән тарасаң, ялтырап тормас.