Бөек Җиңүнең 70 еллыгын Мөслим зурлап билгеләп үтте

Быел бәйрәмдә беренче тапкыр "Үлемсез полк"ны да күрергә мөмкин иде. Бөек Ватан сугышында катнашкан бабаларының зурайтылган фотоларын оныклары - мәктәп укучылары алып чыкты.

Район башлыгы Рамил Муллин һәм ТР Президенты исеменнән Фән һәм мәгариф министры урынбасары Айдар Каюмов котлавыннан соң Рамил Хәмзович 15 тыл ветеранына фатир ачкычларын тапшырды. 6 тыл ветераны яңа йорттан фатир алу өчен сертификатларга ия булды.

Район үзешчәннәре көче белән әзерләнгән театральләштерелгән күренеш сугыш мизгелләрен, Җиңү көнен чагылдырды. Соңыннан оешма-предприятиеләр илебез азатлыгы өчен көрәшкән райондашларыбыз истәлегенә веноклар, чәчәкләр салды.