Мөслим-информ

«Батам» дип ялганлап кычкырма! Коену сезонында истә тотарга кирәкле КИҢӘШЛӘР

Татарстанда 1июньнән 31 августка кадәр коену сезоны ачыла. Һава да һәм су да салкын әле, ләкин эссе көннәр башлануга, дәррәү елгаларга һәм күлләргә кузгалачакбыз. Онытмыйк: сулыкларда саклык чараларын катгый үтәү зарур.

– Узган ел коену сезонында 54 кеше батып үлде, – дип куркыныч саннарны искә төшерде Россия Гадәттән тыш хәлләр министрлыгының Татарстан буенча баш идарәсе җитәкчесе урынбасары Юрий Венедиктов «Татар-информ» мәгълүмат агентлыгында үткәрелгән матбугат конференциясендә.
Су температурасы 17-19 градус җылылыкка җиткәч кенә коенырга ярый.

– Спиртлы эчемлек кулланган яки бик каты тирләгән килеш коенырга ярамый. Республикада май аенда гына да тугыз исерек батып үлде инде. Кеше организмының 90 проценты судан гыйбарәт булса да, су – кешенең «дошманы». Суда артыгын шаяру, батыр булып кылану – акылсызлык. Суга баткан кеше бер минутта ук үлә, – дип кисәтте Юрий Венедиктов.

Татарстанда 35 рәсми пляж исәпләнә, шуларның 15е тикшерү-кабул итү узган. Мамадышта һәм Зәйдә пляжларга реконструкция үткәрелә. Узган ел Түбән Кама шәһәре пляжы төзекләндерелгән.
«Запрещено» билгесе куелган урыннарда су коену тыела. Бу таләпне үтәмәгән кешеләргә 1-1,5 мең сум штраф салына.


– Авыллардагы буаларда һәм күлләрдә су коенган өчен штраф түләтелми. Муниципаль органнар шулай да елгалардагы хәвефле урыннарны күрсәткән игъланнар урнаштырырга тиеш, – дип аңлатты Юрий Венедиктов. – Чаллы, Яшел Үзән, Бөгелмә муниципаль берәмлекләрендә батып үлүчеләр күп.

Исеңдә тот

Таныш булмаган һәм суүсемнәр (камышлар) үскән урында коенмагыз;
суга баш белән сикермәгез;
суга акрынлап кына керегез;
елгада яки күлдә еракка йөзеп кермәгез, чөнки кинәт кенә хәлегез китүе ихтимал;
суда чакта «Батам!» дип ялганлап кычкырмагыз;
балаларның бил тиңентен булган суда гына балаларны йөзәргә өйрәтегез;
машина тәгәрмәче камерасы яки «матрац» белән еракка йөзеп кермәгез, бу гамәл йөзә белмәгән кешегә аеруча хәвефле;
төнлә, яшенле яңгыр яки көчле җил вакытында су коенмагыз.
Татарстанда 5 июньдә «Уылдык» операциясе вакыты тәмамлана.
– Республикада теркәлү узган 35 мең кече күләмле көймә исәпләнә. Аның теркәлмәгәннәре дә бихисап. Теркәлү узмаган 200 килограммнан авыррак көймәләрдә сулыкларга чыккан очракта штраф салына, – диде Юрий Венедиктов.

Көймәдә чыгучылар колагына
Балык тотарга яки ял итәргә кайсы урынга баруыгызны туганнарыгызга әйтеп калдырыгыз; үзегез белән көймә документларын, коткару жилетларын, фонарь, телефон алырга онытмагыз; елгага көймәнең техник документында күрсәтелгән ераклыкка гына керегез; елга суднолары йөргән юлга туктамагыз, мотор сүнсә, читкә китү чарасын күрегез; ишкәкләр көймәгә бәйләнгән булсын; көчле дулкында елгага кермәгез, көймә капланса, көймәгә ябышып торган кеше 30-40 минутта туңып, су төбенә китә.
Татарстанда бу җәйдә «Безопасная рыбалка» интернет-порталы эшли башлый.
Коткару хезмәте телефоны: 112.

ЧЫГАНАК: http://shahrikazan.ru/news/tema-dnya/batam-dip-yalganlap-kychkyrma

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Реклама
Комментарии (0)
Осталось символов: