Реклама
Яңалыклар
Бакчага түләү артты
2021нче елның 1 гыйнварыннан балалар бакчаларына түләү артты. Баланы караган һәм тәрбияләгән өчен ата-аналар түләве 4 процентка күтәрелде.
Балалар бакчаларына түләү ел саен күтәрелә. Сумма әллә ни артык күп булмаса да, акчага мохтаҗ булганнарга нык сизеләдер. Түләү уртача 125 сумга артты.
– Бакчага биш көн йөрүче 3 яшькә кадәрге балалар өчен айлык түләү 2967 сумны тәшкил итә. Өч яшьтән зурраклар 10,5 сәгатьлек гомуми үсеш төркемендә булганда ата-аналар түләве 3252 сумга төшәчәк. Алты көнлек төркемнәргә йөрүче 3 яшькә кадәрге балалар өчен түләү – 3560 сум, 3-7 яшьлекләр өчен – 3900 сум. Кагыйдә буларак, күпбалалы гаиләләргә әлеге сумманың яртысын гына түли. Ата-аналар түләве арту балалар бакчаларының эшчәнлеген финанслауга да, туклану мәсьәләләренә дә бәйле, – ди район мәгариф идарәсе җитәкчесе Рафаэль Демидов.
Район үзәгендәге һәм авыллардагы ун балалар бакчасын быел азык-төлек продуктлары белән бер генә эшмәкәр тәэмин итәчәк. Ул – аукционда җиңү яулаган “Граф” җәмгыяте җитәкчесе Зәмирә Гыйльфанова. Җирлегебездә озак еллар эшләүче эшмәкәр сабыйларны ел дәвамында сыйфатлы ризык белән тәэмин итәр дип ышана бакча мөдирләре.
– Узган елларда бакчага продукцияне берничә эшмәкәр китерә иде. Төрле шәһәрләрдән китерелгән ризык сыйфаты белән дан булмады. Черек бәрәңге, шиңгән җиләк-җимеш тә туры килгәләде. Бәрәңге мал-туарга пешерә торганнан аерылмый иде, дияргә була. Анысын да көчкә җиткереп бардык. Быел иркен сулыш алдык. Яңа меню һәм сыйфатлы ризык белән әзерләнгән ризык аерылып тора – балалар иртәнге ашны да, төшке, кичке ризыкларны да бик яратып ашыйлар. Зәмирә Гыйльфанованың продуктлары бик яхшы, алга таба да шулай булсын иде. Без бик канәгать, – ди район үзәгендәге “Кояшкай” балалар бакчасы мөдире Миләүшә Солтанова.
Авыллардагы күп кенә балалар бакчалары мәктәп белән бер бинада урнашкан. Бер түбә астында булган учреждениеләрдә бакчага йөрүчеләрне һәм мәктәп укучыларын азык-төлек продуктлары белән тәэмин итү шәхси эшмәкәр Эльза Ибраһимовага йөкләнгән.
– Бакчага һәм мәктәпләргә бер генә поставщик билгеләнгәч, балаларны тукландыру мәсьәләсен, ризыкның сыйфатын контрольдә тоту уңайлырак булачак. Бала дөрес тукланырга тиеш. Меню балаларның яшь үзенчәлекләрен исәпкә алып төзелә. Кирәкле барлык микроэлементлар кергән кайнар ашлар һәм перекуслар махсус карта буенча төзелә, – ди Рафаэль Демидов.
Мәгариф өлкәсенә кагылгач, тагын бер яңалыкка күз салыйк. 2021 елда балалар 1 класска яңа кагыйдәләр буенча кабул ителәчәк. Элек әти-әниләрдән гаризалар кабул итү 1 февральдән дә соңга калмыйча башланса, хәзер 1 апрельдә генә кабул ителә башлый. Гаризалар кабул итү 30 июньдә төгәлләнәчәк. Әгәр бала мәктәпкә беркетелгән участокта яшәмәсә, ата-аналар гаризаны 6 июльдән тапшырырга тиеш булалар. Урыннар калса, баланы мәктәпкә кабул итәләр. Юк икән, җирле мәгариф идарәсе ата-анага баланы башка мәктәпкә урнаштыруда ярдәм итәргә тиеш.
Лилия Шәймиева.
Фото – "Мөслим-информ" архивыннан.
Следите за самым важным и интересным в Telegram-каналеТатмедиа
Безнең телеграм каналга кушылыгыз! Телеграм-канал
Нет комментариев