"Авыл хуҗалыгы техникасын яңарту" программасы кысаларында "Туган як" агрофирмасына комбайнннар кайта

Авыл хуҗалыгы товар җитештерүчеләре арасында техника паркын яңартуга игътибар бирүчеләр шактый. Урак башлангач кына да "Туган як" агрофирмасына "Авыл хуҗалыгы техникасын яңарту" программасы буенча дүрт "Полесье-1218" комбайны кайтты. Әлеге агрегатлар агрофирмадагы бер комбайнга туры килгән эш күләмен шактый киметергә мөмкинлек бирде. "Полесье-1218" комбайнының техник характеристикасына килгәндә, күпфункцияле әлеге кыр корабы югары җитештерүчән булуы белән аерылып тора, ягулыкка шактый экономия ясый, тигез булмаган басуларда да җиңел хәрәкәт итә. Бу модель комбайн бөртеклеләр белән бергә кукуруз, көнбагыш, соя, рапс кебек культуралар игүгә дә көйләнгән.