Мөслим-информ

Алда - бәйрәм яллары. Мөслимдә нинди чаралар узачак? (ГРАФИК)

Әлеге бәйрәм тормышыбызга Россиянең беренче Президенты Борис Ельцин указы нигезендә килеп керде. 1994 нче елның 12 июнь көне Россиянең дәүләт суверенитеты турында декларация кабул ителгән көн буларак бәйрәм дип игълан ителде. Бу бәйрәмне Бәйсезлек көне дип тә йөртәләр иде. 2002 елдан әлеге дата рәсми рәвештә Россия көне дип атала.

Россия көне - тынычлык, гражданлык иреге, Россиянең күпмилләтле халкының бердәмлеге бәйрәме. Нинди генә өлкәләрдә, республикаларда яшәсәк тә, нинди генә телләрдә сөйләшсәк тә, без - Россия гражданнары. Илебезнең бүгенгесе һәм киләчәге өчен без һәммәбез дә тигез җаваплы.

Быел бәйрәм уңаеннан өч көн - 10, 11, 12 июньнәрдә ял итәбез. Мөслимдә әлеге бәйрәм уңаеннан кызыклы чаралар әзерләнгән.

12 июньдә район мәдәният йорты хезмәтчәннәре мөслимлеләрне 17.00 сәгатьтә Россия көненә багышланган концертка Пушкин скверына чакыралар.

"Яшьлек" спорткомплексында пляж волейболы буенча ярышлар узачак. "Мизгел" яшьләр үзәге райондашларыбызны велоузышка чакыра. Чара 18.00 сәгатьтә "Дуслар клаб" кафесы артындагы мәйданда башлана. Быел, башка еллар белән чагыштырганда, велоузыш маршруты үзгәрәчәк. Ничек үзгәрүен чараны оештыручылар әлегә сер итеп саклый. Велоузышта катнашучылар биш номинациядә бүләкләнәчәк, "Мин горурланам синең белән, Россия!" селфи-фото конкурсы җиңүчеләрен дә бүләкләр көтә.

"Урман иле" сәламәтләндерү лагеренда 12 июньдә "Россия - бөек ил" исемендә интеллектуаль уеннар үтәчәк. Мөслим сәнгать мәктәбе мөслимлеләрне 13 июньдә "Курай" паркына чакыра. Биредә сәнгать мәктәбе укучыларының "Мин яратам сине, Россия!" концерты уза, шулай килгән тамашачыларны бию флэш-мобы көтә, асфальтта рәсем ясау конкурсы да үткәреләчәк.

Бәйрәм яллары актив һәм кызыклы үтсен!

Иң мөһим һәм кызыклы язмаларны Татмедиа Telegram-каналында укыгыз


Нравится
Поделиться:
Реклама
Реклама
Комментарии (0)
Осталось символов: