Агачлар су сорый

Мөслим лицееның 5 сыйныф укучылары “Табигатьне саклау – уртак бурычыбыз” исемле акциягә чыкты. Егет-кызлар Мөслимнең лицейга беркетелгән Банк урамында алмагачларга су сиптеләр. Балалар суны шушы урамда яшәүчеләрдән алып чыкты. Әти-әниләр дә балаларына ярдәмгә килде – цистерна белән су китерүчелә дә булды. Берочтан балалар өлкәннәргә табигатьне саклау турында буклетлар да таратты һәм чүпләрне дә җыештырды.

– Үләнне чабабыз, агачларга, таякка таянып булса да, су сиптем, – ди шушы урамда яшәүче Җәннәт апа Нуретдинова. – Агачларны утыртканнар, Алланың рәхмәте яусын!  Үсентеләрне тәрбияләү – безнең бурыч.

Тик һәркем дә Җәннәт апа кебек уйламый, күрәсең. Йорты каршында утырган агачның суга тилмерүен күрәләр югыйсә. Әллә суны кызганалар, әллә авырсыналар. Үсентеләрне суга туендыру саваплы гамәл, югыйсә.

Римма Афзалова.