Юлчылар юлны табар

Изге җан ул – игенче,

“Күз тимәсен”, – дигенче.

Иртә таңнан басуда,

Хөрмәткә лаек шуңа!

                  ***

Төзәтергә ашыгасың,

Ялгыш ясасаң әгәр.

Мәхәббәттәге ялгышны

Төзәтү кыен, мәгәр.

                 ***

“Утырабыз да китәбез...”

Бу шулай иде элек.

Хәзер кулны күтәрәбез,

Кесәнең хәлен белеп.

                  ***

Үлем куркынычы яный,

Гомер дәрьясын кичкәч.

“Корвалол” гына коткармый

“Яр”ның читенә җиткәч.

                    ***

Утырганнар янәшә,

Ике әби серләшә:

Берсе сөйли чиләкне,

Икенчесе – иләкне.

                     ***

Газеталар өйгә килсә,

Укыйбыз, шатланабыз.

Ни кызганыч, атнага бер

Барып кына алабыз.

                     ***

Сакалын үстереп куйган

Армиягә барганчы.

Байтак еллар үтәр әле

Ул сакал агарганчы!

                     ***

Ике дистә генә яше,

Агармаган әле чәче,

Бөтен битен сакал баскан,

Әйтерсең зинданнан качкан.

                     ***

Юлчылар юлны табар,

Тырышкан кадак кагар,

Утлар яктырак янар,

Имин булса дөньялар.

                     ***

Гомремнең бер яртысын

Уздырдым Минзәләдә.

“Минзәлә”не җырласалар,

Үзәгем өзгәләнә.

                     ***

Сөйгән яры насыйп була

Бәхетле бәндәләргә.

Озын гомер бирә Ходай

Кадерен белгәннәргә.

                  ***

– Да, кыз да утызда, – диеп

Әйткән икән әтисе.

– Егерме тугызда гына, –

дип “төзәткән” әнисе.

                    ***

Ярый әле базар бар:

Югалганны табалар,

Кечене зурайталар,

Бөкрене турайталар.

                  ***

Һәр милләтнең үз теле,

Тел – милләтнең бизәге.

Телен саклаган милләт –

Ходайның үз дигәне.

Гөлназ Җәлилова фотосы