Китап ул – тиңсез хәзинә

Чулпан Хәйруллина, рус теле һәм әдәбияты укытучысы:

Яраткан китабым – Михаил Булгаковның “Мастер и Маргарита” романы. Әсәрдә сүз бүгенге чынбарлыкка охшаш дөньяда мәхәббәт көче, ышаныч һәм азатлык турында бара. Роман – акыллы фикерләр һәм тирән идеяләр белән сугарылган, уйландыра һәм тормышка карашны үзгәртә торган әсәрләрнең берсе. 

Китаплар – башкаларның тормыш тәҗрибәсеннән тупланган хәзинә. Һәр яңа китап үсәргә, өйрәнергә һәм яхшы якка үзгәрергә мөмкинлек бирә. Китаплар кешенең дөньяга карашына йогынты ясый. Бер китап кына фикерне яки дөньяга карашны үзгәртә алмый, дип уйлыйм. 

Күптән түгел Василь Быковның “Обелиск” повестен укыдым. Әсәрдә буыннар алмашы, чорлар арасындагы тыгыз бәйләнеш, традицияләргә тугрылык мәсьәләләре күтәрелә. Төп герой укытучы Алесь Морозны автор гадәти булмаган, башкаларга охшамаган, тыйнак кеше итеп күрсәтә. Мороз балаларга гаделлек турында сөйләп кенә калмый, авырлыклардан курыкмыйча, дөреслекне исбатларга, аңа ирешүдә үрнәк тә күрсәтә.

Сәхифәне Римма Афзалова алып бара.

Тулырак "Авыл утлары" газетасының 2024 ел 22 март санында укыгыз