Талауда гаепләнә

Ир-ат РФ Җинаятьләр кодексының 161 маддәсе 2 өлешенең “г” пунктында каралган җинаять кылуда гаепләнә (кеше тормышы һәм сәламәтлеге өчен зыянлы булмаган көч куллану куркынычы белән талау, ягъни чит мөлкәтне ачыктан-ачык урлау).
Тикшерү версиясе буенча, 2023нче елның 28 мартында якынча 11 сәгать 05 минутта эш фигуранты “Агроторг” җаваплылыгы чикләнгән җәмгыятенең Мөслим авылының Шашин урамындагы “Пятерочка” кибетенә килә.
– Ир-ат, көч куллану белән янап, кибеттән 0,7 литр күләмендә 340,69 сумлык  һәм 0,5 литр күләмендә 244,43 сумлык ике төр спиртлы эчемлек урлый, – ди район прокуроры урынбасары Линар Әскаров.
Гаепләнүче гаебен тулысынча таныды, кылганнарына үкенде. Җинаять эше Мөслим районы судына җибәрелде.

Фото – “Татар-информ” архивыннан.