Юлчыларның урак өсте

Дөрес, ишеп кар яуганда, буран бар дөньяны урап алып дулаган көннәрдә “эшләмиләр” дип юлчыларны сүгүчеләр дә бар. Чананы – җәйдән, арбаны кыштан әзерлә, ди халык. Әлеге әйтемгә таянып, район “Төзекләндерү һәм яшелләндерү” унитар предприятиесе карлы кышка бүгеннән үк әзерләнә.

– Предприятиенең 18 берәмлек техникасы бар. Аларны бүген энә күзеннән үткәреп, яңа сезонга әзерләү бара. Кар-бураннар былтыр коммуналь оешмаларны яхшы сынады. Быелгы кыш та шулай булса, шактый авырга туры киләчәк. Күпфатирлы йортларның ишегалларын, машина кую урыннарын кардан арындыруда, юлларны карап тотуда без, үз чиратыбызда, өзеклекләр булмасын дип тырышабыз. Җәяүлеләр һәм транспорт йөрер өчен шартлар тудырырга бөтен кирәкле техникабыз да бар, – ди “Төзекләндерү һәм яшелләндерү” унитар предприятиесе җитәкчесе Марат Шәймөхәмәтов.

Быел да юлларны кардан арындыру эшләре оешкан рәвештә алып барылачак. Авыл җирлекләрендә эш килешү нигезендә оештырылачак. Региональ юлларда – “Татавтодор” җәмгыяте, Мөслим авыл җирелегендә “Төзекләндерү һәм яшелләндерү” предприятиесе хезмәт күрсәтәчәк.

“Татавтодор” җәмгыятенең Минзәлә филиалы Мөслим участогы эшчеләре дә җиң сызганып кышка әзерләнә.

Тулырак «Авыл утлары» газетасының 2024 ел өчен 6 декабрь саныннан укыгыз.

Фотолар - район хакимиятенең матбугат хезмәтеннән.