"Снегоход" операциясе игълан ителде

Республика күләмендә, шул исәптән безнең районда да, "Снегоход" операциясе игълан ителде. Аның барышында әлеге төр транспортның теркәлгән булуы, иминиятләштерүе тикшереләчәк. ДАИ хезмәткәрләре тәүлекнең теләсә кайсы вакытында урман-басуларда рейд оештырылачагын да хәбәр итә. Бу төр техника белән рөхсәтсез идарә итүчеләр җавапка тартылачак. Бүгенге көндә теркәүгә алынган снегоходлар саны - 17. Районның ДАИ начальнигы Айнур Хәйретдинов чынлыкта бу санның өчләтә күбрәк булуын әйтә. Ник дигәндә, бу техникага да транспорт салымы түлисе. Ә кеше, акча түләмәс өчен җиңел юл эзләп, әлеге транспортны сатып алганда аны дәүләт органнарыннан качырырга тырыша. Узган ел гына да шундый рейд барышында, 7 снегоход хуҗасы тоткарланып, административ җаваплылыкка тартылган.