Рамил Муллин авыл хуҗалыкларында булып, язгы чәчү эшләре белән танышып кайтты

2 май көнне район Башлыгы авыл хуҗалыгы һәм азык-төлек идарәсе җитәкчесе һәм белгечләре белән берлектә хуҗалыкларга чыгып, язгы кыр эшләре барышы белән таныштылар. Белгечләр "Туган як", органик-групп "Урожай", "Ык" җәмгыятенә караган агрофирмаларда, эре һәм вак крестьян-фермер хуҗалыкларында булдылар.

2 майга булган мәгълүматлар буенча районда 10150 гектарда чәчү башкарылган. Бу планның 22% тәшкил итә. Бүген барлык хуҗалыклар да бөртекле культуралар чәчү белән мәшгуль. Органик-групп "Урожай" һәм "Ык" агрофирмаларында язгы кыр эшләре куелган сроклардан соңрак башлану сәбәпле, эшкәртәсе, чәчәсе мәйдан шактый күп. Шунлыктан, органик-групп җәмгыятенең генераль директоры Илдар Гыймадиевка эш темпын арттыру бурычы куелды. Эшне озайтылган сменаларда оештырырга, мәсьәләләрне урында һәм тиз хәл итәргә кирәклеге ассызыкланды.

"Туган як" агрофирмасында уҗым культураларын чүп үләннәренә каршы гербицид белән эшкәртү башланган. "Урожай", "Ык" агрофирмаларында исә бу эш вакытны экономияләү һәм эшне тизләтү максатыннан авиация ярдәме белән башкарылачак. Гербицид белән бергә микро, макро ашламалар, стимулятор препаратлар да кертеләчәк.

"Агрофирмаларда , крестьян-фермер хуҗалыкларында кирәкле техника җитәрлек, ягулык-майлау материаллары белән тоткарлык юк", ди район авыл хуҗалыгы һәм азык-төлек идарәсе белгечләре.

Рамил Муллин авыл хуҗалыгы һәм азык-төлек идарәсе белгечләренә, агрофирма, крестьян-фермер хуҗалыклары җитәкчеләренә иртә бөртекле культураларны чәчүне 15 майга төгәлләү бурычын куйды.