Татарча көрәш һәм кул көрәше буенча турнир үтте

Яр Чаллы шәһәрендә Татарстан Республикасы мөселманнары Диния Нәзарәте кубогына мөселманнарның татарча көрәш һәм кул көрәше буенча берләштерелгән XV россиякүләм турниры үтте.

"Анда Мөслим районы мөхтәсибәте данын яклап бертөркем райондашларыбыз катнашты һәм уңышлы чыгыш ясады.

Әмир Каюмов кул көрәше буенча 70 кг категориясендә икенче урынны алды, Диния Нәзарәтенең зур бүләге - кубок һәм дипломга ия булды", - дип хәбәр итәләр мөхтәсибәттән.

Дипломда Мөфти Камил хәзрәт Сәмигуллинның шундый сүзләре язылган: "Иманлы, сәламәт тормыш алып баруыгыз өчен сезгә Аллаһның рәхмәтләре булса иде! Киләчәктә дә башка яшьтәшләрегезгә үрнәк булып, динебез кушканча яшәрсез дип ышанып калабыз".

Фото - Мөслим мөхтәсибәте архивыннан.